ABŞ prezidenti Co Bayden Türkmənistanın Müstəqillik Günü (27 sentyabr) münasibətilə həmkarı Serdar Berdiməhəmmədova təbrik məktubu göndərib.

Yenixeber.org: Məktubda Bayden Türkmənistanla tərəfdaşlığı genişləndirməyə, dərinləşdirməyə və gücləndirməyə ümid etdiyini bildirib.

“Gələn ildə mən tərəfdaşlığımızı daha da inkişaf etdirməyə və genişləndirməyə ümid edirəm”, - məktubda deyilir.

Co Bayden təbrikində iki ölkə arasında əməkdaşlığın əsas istiqamətlərini qeyd edib. Onun sözlərinə görə, Vaşinqton və Aşqabad terrorizmlə mübarizə də daxil olmaqla, regionda təhlükəsizlik və sabitliyin təmin edilməsinə birgə töhfə verir. Amerika prezidenti qeyd edib ki, iki dövlət “iqlim böhranını aradan qaldırmaq və metan emissiyalarını azaltmaq üçün birgə işləyir”.

Qeyd edək ki, Türkmənistanın hazırkı prezidenti Serdar Berdiməhəmmədov Mərkəzi Asiya ölkəsinin liderlərinin Baydenlə ilk görüşündə iştirak edib. Qeyri-rəsmi sammit Nyu-Yorkda BMT Baş Assambleyası çərçivəsində keçirilib. Görüşdə Berdiməhəmmədovla yanaşı, Qazaxıstan, Qırğızıstan, Tacikistan və Özbəkistan liderləri Kasım-Jomart Tokayev, Sadır Japarov, Emomali Rahmon və Şavkat Mirziyoyev iştirak ediblər.