“Gəlin dünya ictimaiyyətini aldadaraq, əhali arasında təşviş yaradaraq guya Qarabağda yaşayanların acından öldüyünü iddia etməyək”.

Yenixeber.org: CBC telekanalında yayımlanan videosüjetdə qeyd edilir ki, bu sözləri Ermənistanda yayımlanan telekanalın efirində çıxışı zamanı Azərbaycanın Qarabağ bölgəsində özünü separatçıların nümayəndəsi kimi təqdim edən Artur Osipyan deyib.

O, blokada və ərzaq çatışmazlığı iddialarını təkzib edib.

Artur Osipyan vurğulayıb ki, hazırda Qarabağda yaşanan vəziyyət, əslində, hər zaman mövcud olub və ölkəyə rəhbərlik etmiş şəxslər 30 il ərzində Qarabağı talan ediblər.

“Hazırda yaşananların blokada ilə əlaqəsi yoxdur, Qarabağda bir qrup insan hər zaman yaxşı yaşayıb, digər qrup isə bir tikə çörəyi çətinliklə qazanıb”, - Artur Osipyan vurğulayıb.

Süjetdə Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyovun Fransanın aparıcı “LeMonde” qəzetinə müsahibəsinə də yer verilib.

Həmin müsahibədə Elçin Əmirbəyov vurğulayıb ki, Ermənistan 2020-ci il 10 noyabr tarixli Üçtərəfli Bəyanata uyğun olaraq Laçın yolundan humanitar məqsədlər üçün istifadə edilməli olduğu halda, iki il yarım müddət ərzində rəsmi İrəvan bu yoldan qeyri-qanuni məqsədlər, o cümlədən Azərbaycan ərazisinə silahlı qüvvələrini, habelə silah-sursat göndərmək üçün sui-istifadə edib.