Fransa Silahlı Qüvvələrinin Sen-Sir Hərbi Akademiyasının nümayəndələri Ermənistan Müdafiə Nazirliyinin Vazgen Sarkisyan adına Hərbi Akademiyasında olublar.

Yenixeber.org: Ermənistan KİV-nə istinadən xəbər verir ki,  görüşdə parlamentin Müdafiə və təhlükəsizlik məsələləri daimi komissiyasının sədr müavini Armen Xaçatryan da iştirak edib.

Qonaqlar akademiyanın ərazisini gəzib, yaradılan şərait, imkanlar və tədris obyektləri ilə yaxından tanış olublar. Onlara akademiyanın strukturu, fəaliyyəti və tədris proqramları təqdim olunub.

Akademiyaların qarşılıqlı fəaliyyəti ilə bağlı məsələlər müzakirə olunub.

Ermənistan müdafiə nazirinin müavini Arman Sarkisyanın və Fransanın Ermənistandakı fövqəladə və səlahiyyətli səfiri Olivye Dekotininin iştirakı ilə akademiyada müasir həllər ilə təchiz olunmuş fransız dili kabineti açılıb.

Yeni auditoriyanın açılışı şərəfinə qırmızı lenti kəsmək fəxri hüququ iki akademiyanın əməkdaşlığı çərçivəsində Ermənistanda təhsil alan fransalı kursant və Fransaya təlim keçmək üçün gedən erməni kursantına verilib.