Azərbaycan Dövlət Neft Şirkətinin (SOCAR) "Azerkimya" İstehsalat Birliyinin "Etilen-polietilen" zavodunun direktoru Oqtay Niftəliyevə cərimə protokolu tərtib edilib.

Yenixeber.org: Buna direktorun işçinin əmək müqaviləsinə qanunvericiliyin tələblərini pozaraq xitam verməsi səbəb olub.

Belə ki, Əmək və Əhalinin Sosial Müdafiəsi Nazirliyi (ƏƏSMN) yanında Dövlət Əmək Müfəttişliyi Xidməti (DƏMX) müraciət əsasında zavodda yoxlama aparıb.

Yoxlamanın nəticəsinə uyğun olaraq, DƏMX Oqtay Niftəliyev barəsində İnzibati Xətalar Məcəlləsinin 192.6-cı maddəsinə cərimə protokolu tərtib edib.

Direktorun barəsində protokol tərtib olunan maddədə deyilir ki, işçinin əmək müqaviləsinə əmək qanunvericiliyinin tələbləri pozularaq xitam verilməsinə görə vəzifəli şəxslər min beş yüz manatdan iki min manatadək məbləğdə cərimə edilir.

O.Niftəliyev isə DƏMX-in qərarından məhkəməyə şikayət edib. İş Sumqayıt Şəhər Məhkəməsində hakim Ramiz Quliyevin icraatına verilib.

Qeyd edək ki, daha əvvəl ötən il Dövlət Ekoloji Təhlükəsizlik Xidməti zavoddan tullantı suların Sumqayıtçaya, oradan da Xəzər dənizinə axıdıldığına görə O.Niftəliyevi cərimələyib.(İqtisadiyyat.az)