Bəxtiyar Əliyevlə keçirilən görüşü "yüksək səviyyədə" təşkil etdiyinə görə, icra hakimiyyətinin başçısı icra nümayəndəsini "mükafat"landırıb

Yenixeber.org: 119 saylı Ağdam kənd seçki dairəsində yeni xəbər var.... Ağdam Rayon İcra Hakimiyyətinin (RİH) başçısının 1-ci müavini Allahverən Əliyevin Seçki Məcəlləsinin bütün tələblərini kobud surətdə pozaraq, deputatlığa namizəd Bəxtiyar Əliyevin seçki təbliğatına heç nədən və heç kimdən çəkinmədən birbaşa rəhbərlik etməsi haqqında məlumat vermişdik.

Rayondakı mənbələrdən Yenixeber.org-a daxil olan yeni məlumata görə Bəxtiyar Əliyevdən ötrü "canını fəda edən" yerli məmurlardan biri də, Ağdam Rayon Dörd Yol deyilən ərazinin icra nümayəndəsi Musa Məmmədovdur. 70 yaşlı Məmmədovun məlum qanunları ayaqlar altına ataraq, inzibati resusrsladan sui-istifadə edərək Bəxtiyar Əliyevdən yana çalışmaqdadır. Bu istiqamətdə məlum şirnikləndirici vasitədən istifadə etdiyi də deyilir... Görüş iştirakçılarına saatlarla təlim keçərək, "Bəxtiyar, Bəxtiyar" şüarını da məşhurlaşdırır. 

Hətta srağagün (avqustun 20-də) Dörd Yol ərazisindəki klubda Bəxtiyar Əliyevlə keçirilən görüşü "yüksək səviyyədə" təşkil etdiyinə görə, dünən rayon icra hakimiyyətinin başçısı tərəfindən "mükafat" da alıb. Görünür RİH başçısı bugünləri nəzərə alıb da, vaxtilə cəzalandırdığı qocaman Musa Məmmədovu yenidən görəvə gətirib. (Bu məsələdə "Tərəqqibank" da rol oynamış ola bilər...)   

Maraqlıdır ki, aidiyyatı dövlət qurumları da Ağdam Rayon İcra Hakimiyyətinin başçısı Vaqif Həsənovun tabeçiliyindəki "ordu"nu Bəxtiyar Əliyevdən ötrü səfərbər etməsinə seyriçi qalmaqdadır. Bu səbəblərdəndir ki, 119 saylı Ağdam kənd seçki dairəsindən digər üç namizəd dövlət başçısına müraciət ünvanlayıb....

Hələlik görünən odur ki, bu dəfə əlahəzrət zaman Bəxtiyar Əliyevin xeyirinə işləmir. Ağdamlı seçicilərin Bəxtiyarı bəxtiyar etməyəcəyi gözlənilir...