"Atam, bacım və bacımın uşağı 1992-xi ildə "Tunel" qırğını zamanı ermənilərin silahlı hücumuna məruz qalıb".

Yenixeber.org: Bunu Kəlbəcərə ezam olunmuş əməkdaşına həmin faciə zamanı ailə üzvlərini itirmiş Kəlbəcər sakini Əfsəl Mirzəyev deyib.

Həmin hadisələrlə bağlı xatirələrini bölüşən Ə.Mirzəyev bildirib ki, hadisələrin cərəyan etdiyi dönəmdə atası məktəb direktoru, bacısı isə müəllim vəzifəsində çalışırmış:

"Həmin vaxtlar mən 26 yaşında idim. Bacımın isə 28 yaşı var idi və o, qonşu kənddə məktəblərin birində müəllim işləyirdi. Həmin günü bacım azyaşlı övladı ilə birlikdə atamgilə qonaq gəlmişdi. Qaçaqaç düşən zaman atam, bacım və onun körpəsi ermənilərin silahlı hücumuna məruz qalıb".

Onun sözlərinə görə, hadisə zamanı atası və bacısı qətlə yetirilib, körpə isə girov götürülüb: "Sonradan bacımın uşağı Beynəlxalq Qırmızı Xaç Komitəsinin vasitəsilə girovluqdan azad edildi. Amma atamın və bacımın harada dəfn olunduqları barədə məlumatımız olmadı. Buna görə də onlar itkin sayılır".

Kəlbəcər sakini Maqsud Rəhimov isə deyib ki, atası Əskərxan kişi "Tunel" qırğını zamanı girov götürülüb. Onun sözlərinə görə, ermənilər atasının olduğu avtobusu pusquya salaraq bir neçə şəxsi güllələyib, bir qismini isə girov götürərək işgəncələrə məruz qoyublar.

Qeyd edək ki, "Tunel" qətliamını törədən dəstəyə məşhur terrorçu, sonralar Ağdam rayonu ərazisində öldürülən "Avo" ləqəbli Monte Melkonyan başçılıq edib.