ABŞ-da prezident Donald Trampla baş prokuror Uilyam Barr arasında yeni münaqişə törəyib.

Yenixeber.org: Xarici agentliklər xəbər verir ki, Birləşmiş Ştatların dövlət başçısı özünün Tvitter sosial şəbəkəsindəki mikrobloqunda istədiyi cinayət işinə qarışacağını bəyan edib.

Bununla o, ABŞ-ın baş prokuroru (həm də ədliyyə naziri-red.) Uilyam Barrın Ağ Evdən gələ biləcək hər hansı müdaxilənin yolverilməzliyi barədə söylədiyi sözlərə cavab vermiş olub.

“Baş prokuror Barr mənim ona hansısa cinayət işi barədə xahiş etmədiyimi söyləyib. Lakin bu mənim Prezident kimi qanuni olaraq qarışmayacağım anlamına gəlməz. Mən sadəcə lüzumsuz yerə bu işlərə müdaxilə etməmişəm”,-deyə Trampın tvitində yazılıb.

“Reuters” agentliyinin məlumatına əsasən baş prokuror Uilyam Barr prezidentlə şəxsi söhbətlərində onun tvitlərinin Ədliyyə nazirliyinin işinə mane olduğunu deyib.

Daha sonra Uilyam Barr ABC kanalına müsahibəsində əslində bu xəbəri inkar etməyib. O, Donald Trampın sosial şəbəkədə ölkənin hüquq-mühafizə orqanlarına hücumunun qurumun işini “imkansız” hala gətirdiyini bildirib. “Cənab prezident bu tvitlərinə son qoymalıdır”,-deyə Uilyam Barr cəsarətli çıxış edib.

Baş prokuror jurnalistin prezidentin onun sözlərinə neqativ reaksiya göstərə biləcəyi sualını “əlbəttə” deyə cavablandırıb.
“Lakin heç kim, nə Konqres, nə hansısa qəzetin redaksiyası, nə də prezident mənə təsir göstərə bilməz”,-deyə Uilyam Barr söyləyib.