Ermənistan və Türkiyə liderləri arasında telefon danışığı iki ölkə arasında münasibətlərdə paradiqmanın dəyişməsindən və Ankaranın Cənubi Qafqazdakı rolundan xəbər verir. İrəvanın addımları Ermənistan hakimiyyətinin Ankaranı Moskvadan üstün tutduğu təəssüratını yaradır.

Yenixeber.org: Bunu erməni politoloq Suren Surenyants deyib.

“Maraqlıdır, regional status-kvonun dəyişməsindən, İrəvanın xarici siyasətini balanslaşdırmağa çalışmasından, yaxud Paşinyan üçün Ankaranın şərti “Moskva”ya çevrilməsindən danışmaq olarmı? Ankara “notarius” rolunu oynayır və Ermənistana “kadastr arayışı” verir?!” - o bildirib.

Surenyantsın fikrincə, Paşinyanın ötən şənbə günü etdiyi bir sıra zənglər Ermənistanın siyasi kursuna yenidən baxılmasından xəbər verir:

“Nikol İran, Fransa, Gürcüstan liderləri, eləcə də ABŞ dövlət katibi ilə sərhəddə eskalasiya təhlükəsini müzakirə edib. Rusiya prezidenti ilə heç bir söhbət olmayıb və bu, İrəvanla Moskva arasında münasibətlərin böhranlı olduğunu bir daha təsdiqləyir. Qəribədir ki, Paşinyanın Rusiya tərəfi ilə telefon danışığı olmayıb. Burada iki versiya irəli sürülür: ya Paşinyan nəticələri olan yeni macəraya başlayır, ya da Rusiya ilə münasibətləri o qədər korlayıb ki, onunla telefon danışıqları Moskvada tələb olunmur”.

Politoloq əmindir ki, daxili siyasi vəziyyətə əsaslanaraq Ermənistanın baş naziri hazırkı mərhələdə Azərbaycanla sənəd imzalamaqdan yayınmaq istəyəcək:

“Belə olan halda Paşinyan Ankara vasitəsilə Bakının “aqressiv istəklərini” cilovlamağa cəhd edə bilər. Ancaq birincisi, bunun nəticə verəcəyi fakt deyil, ikincisi, Türkiyə bunun müqabilində daha yüksək qiymət tələb edə bilər”.