Yenixeber.org:  İranın Xarici İşlər naziri Hüseyn Əmir Abdullahiyan belə bəyanatla çıxış edib.
“Oman bütün tərəfləri JCPOA-dakı öhdəliklərinə qaytarmaq məqsədi ilə fikirləri yaxınlaşdırmağa çalışır. Oman JCPOA ilə bağlı təşəbbüslər irəli sürüb, onlar müzakirə və mübadilə edilib”, - Abdullahiyan deyib.
Bir neçə gün əvvəl Omanın Xarici İşlər naziri Bədr bin Həməd əl-Busaidi elan edilmədən Tehrana gedib və bu, İran mediasında JCPOA-nın canlandırılması üçün danışıqların taleyi ilə bağlı fərziyyələr doğurub. Bu fonda İranın azad bazarında dolların qiyməti də 48 min tümənə qədər azalıb ki, müxtəlif media resursları, o cümlədən də “Etemad Online”, bunu Omanın yüksək səviyyəli diplomatının Tehrana səfəri ilə əlaqələndirib.
Qeyd edək ki, Oman JCPOA-nı canlandırmağa çalışan İran və ABŞ arasında nüvə danışıqlarında əsas vasitəçilərdən biridir. Keçən ay Axios internet saytı İran və Amerika rəsmilərinın Omanda dolayı danışıqlar apardıqları, omanlıların isə ayrı-ayrı otaqlarda olan İran və ABŞ təmsilçilərinə mesajlar ötürüdükləri barədə xəbərlər dərc etmişdi.