Dünya ictimaiyyəti, o cümlədən Almaniya 6-8 il əvvəl Rusiyanın əsl niyyətlərini anlamadığına və o dövrdə mövcud olan çağırışlara kifayət qədər reaksiya vermədiyinə görə Ukraynadan üzr istəməyə borcludur.

Yenixeber.org: Bunu Almaniya diplomatı, Münhen Təhlükəsizlik Konfransının keçmiş rəhbəri Volfqanq İşinqer deyib. O, bununla da Qərb ictimaiyyətinin Rusiya ilə bağlı qərarlarının yanlışlığını etiraf edib.

“Mən qəti şəkildə inanıram ki, Rusiyanın niyyətləri Ukraynanı sadəcə məhv etməkdən daha da irəli gedir. Rusiya Avropa İttifaqı, Qərbi Avropa, Avro-Atlantik Alyans və bütün dünya qarşısında meydan oxuyur. Bu, təkcə Ukraynaya deyil, hamımıza qarşıdır”, – deyə diplomat vurğulayıb.

Diplomat həmçinin etiraf edib ki, dünya Krımın və Donbasın bir hissəsinin işğalına layiqli reaksiya verməyib.

“Biz düşünürdük ki, hansısa danışıqlar apara bilərik. Bunun isə çətin, hətta qeyri-mümkün olduğu ortaya çıxdı”,- diplomat deyir.

O, həmçinin 2008-ci ildə NATO-nun zirvə görüşündən danışıb, o zaman Ukraynanın Alyansa daxil olmasına imtina verdiklərini etiraf edib.