Şəxsi problemləri ilə bağlı ölkəni tərk etdiyi deyilən Ümid partiyasının sədr müavini, deputatlığa namizəd Ramin Hacılı ilə bağlı sərt ittihamlar səsləndirilib.

"Xeberinfo.com":   Məlumata görə, “qafqazinfo”ya müraciət edən Cənubi Azərbaycandan olan H.X (adını bizə açıqlasa da, saytda yayımlanmasını istəmədi-red.) adlı tələbə bildirib ki, o, üç dostu ilə bir müddət əvvəl Ramin Hacılı ilə tanış olub. Sədr müavini onlara İtaliyada təhsil ala bilmələri üçün yardım edə biləcəyini bildirib və bu məqsədlə də tələbələrin hər birindən 6 min manat pul alıb.

Tələbənin sözlərinə görə, R.Hacılı nəinki onların xaricdə təhsil almalarına, hətta İtaliya konsulluğunda viza əldə etmələrinə belə yardım etməyib:

“Pulumuzu istəyəndə qaytaracağına söz verdi, lakin hər dəfə müxtəlif bəhanələrlə bizi aldatdı. Bir neçə gün əvvəl onu tutduq və xarici pasportunu əlindən aldıq. Hazırda onun xarici pasportu bizdədir və mətbuata açıqladıqları kimi ölkəni tərk etməyib, hardasa buralarda gizlənib. Bununla bağlı polisə müraciət edəcəyik. Çünki bizimlə yanaşı, başqalarını da aldatdığını bilirik”.

Tələbə bildirib ki, 18 min manat pulu Ramin Hacılıya verdiklərinə dair bütün sənədlər onlardadır və lazım gələrsə, onları da mətbuata təqdim edəcəklər.

***

Ümid Partiyasının sədri İqbal Ağazadə müavini barədə səsləndirilən ittihamlara cavab verib. İ. Ağazadə “Qafqazinfo”ya açıqlamasında bildirib ki, səsləndirilən ittihamlar müavinin şəxsi məsələləri ilə bağlıdır: “Bunun mənə aidiyyatı yoxdur. Bu barədə məlumata sahib deyiləm. Siyasətdən kənar işlər barədə məsələlərə cavabdeh deyiləm. Kimin düz deməsi, kimin səhv deməsi hələ dəqiqləşməyib. Hüquq mühafizə orqanları məsələnin dələduzluqla bağlı olub-olmadığını araşdıra bilər. Araşdırmaların nəticəsini biz də müzakirə edəcəyik. Üzvümüz haqlı olduğu yerə qədər onun yanında olacağıq”.