Venesuelada 1994-cü ildə Panamada baş vermiş qanlı terror aktı ilə bağlı beynəlxalq axtarışda olan şəxs həbs edilib.

Yenixeber.org: Venesuela hüquq-mühafizə orqanları, İnterpol və bir neçə ölkənin xüsusi xidmətlərinin birgə əməliyyatı nəticəsində Margarita adasında Ali Zaki Hacı Cəlil saxlanılıb.

Məlumata görə, Venesuela vətəndaşı, lakin mənşəcə livanlı olan Cəlil 1994-cü il iyulun 19-da "Alas Chiricanes" aviaşirkətinə məxsus təyyarədə baş vermiş terror aktının təşkilində iştirakda şübhəli bilinir. Həmin partlayış nəticəsində 21 nəfər həyatını itirmişdi, onlardan 12-si Panamadakı yəhudi icmasının üzvü idi.

İstintaqın məlumatına əsasən, Cəlil terrorçuların logistikası və daşınmasının koordinasiyası ilə məşğul olub. Onun adı uzun illərdir beynəlxalq terror şəbəkələri ilə əlaqədar olan şəxslərin siyahısında yer alırdı.

Hazırda saxlanılan şəxsin extradisiya məsələsi müzakirə olunur. ABŞ və Panama onu təslim almağa hazır olduqlarını artıq rəsmi şəkildə bəyan ediblər.

1994-cü ildə baş vermiş partlayış Latın Amerikasında yəhudi icmasına qarşı ən qanlı hücumlardan biri hesab olunur və bir çox beynəlxalq təşkilat bunu Hizbullah-la əlaqəli terror əməliyyatı kimi qiymətləndirir.