İstanbul Böyükşəhər Bələdiyyə Başçısı Əkrəm İmamoğlunun həbsindən sonra ölkə boyu davam edən etirazları işıqlandırarkən saxlanılan jurnalistlərdən 7-si barəsində həbs qərarı çıxarılıb.

Yenixeber.org: Türkiyədə jurnalistlərə hüquqi dəstək verən Media və Hüquq Araşdırmaları Dərnəyi martın 24-də saxlanılan jurnalistlərin bu gün səhər saatlarında Çağlayan Ədliyyəsinə aparıldığını açıqlamışdı.

Jurnalistlərin “toplantı və nümayiş yürüşləri qanununa müxalifət”də ittiham edildikləri bildirilib.

Daha sonra Türkiyə Jurnalistlər Birliyi “AFP” müxbiri Yasin Akgül, “Now Haber” müxbiri Ali Onur Tosun, foto müxbir Bülənt Kılıç, müxbir Zeynəb Kuray, İBB foto müxbiri Kurtuluş Arı, Bakırköy Bələdiyyəsi foto müxbiri Gökhan Kam və müxbir Hayri Tuncun şərti azadlığa buraxıldığını açıqlayıb.

Lakin bir neçə saat sonra Birlik sözügedən yeddi jurnalistin həbs tələbi ilə məhkəməyə sövq edildiyini bildirib. Jurnalistlərin həbsi üçün sübut kimi etirazlar zamanı çəkilmiş fotoların göstərildiyi qeyd edilib.

Prokurorun əvvəlcə şərti azadlıq tələb etməsi, ardından isə fikrini dəyişərək jurnalistləri həbsə göndərməsi jurnalist birliklərinin etirazına səbəb olub.

“Həmkarlarımızın məhkəmə nəzarəti qərarı ilə şərti azadlığa buraxılması barədə məlumatı bizə vəkillərimiz vermişdi. Lakin sonra nə baş verdiyini bilmirik, prokuror qərarını dəyişdi və jurnalistlər həbs tələbi ilə məhkəməyə göndərildi. Həmkarlarımız jurnalistdir. Onların işi xalqa xəbər çatdırmaqdır. Nəinki həbsə göndərilmək, heç saxlanılmamalı idilər”, – Türkiyə Jurnalistlər Birliyinin bəyanatında deyilib.