Rusiyanın uzaq şərq regionlarında yüzlərlə sakin müxalifətçi Aleksey Navalnıya azadlıq tələbiylə etirazlara çıxıb. Moskvada və digər şəhərlərdə polis etirazçıları, həmçinin Navalnının müttəfiqlərini saxlamağa başlayıb.

Yenixeber.org: Navalnının populyar YouTube kanalının simalarından olan Lyubov Sobol və müxalifət liderinin sözçüsü Kira Yarmış aprelin 21-də Moskvada saxlanıblar. Məlumatı onların vəkilləri verib.

Rusiya parlamentinin aşağı palatası olan Dövlət Dumasının keçmiş spiker müavini Vladimir Rıjkov TASS xəbər agentliyinə deyib ki, polis onu ictimai tədbirlər və kütləvi toplantılarla bağlı qanunu pozmaqda şübhəli bilərək saxlayıb.

Avropa Şurasının Prezidenti Şarl Mişel Navalnının müttəfiqlərinin etirazlar öncəsi saxlanmasını “məyusedici” adlandırıb. “Hakimiyyət toplaşma azadlığa hörmət etməlidir”, – o, Twitter-də yazıb.

Polis Navalnının müxtəlif şəhərlərdəki komanda üzvlərinin evlərində axtarış aparıb.

Rusiyanın insan haqları komissarı Tatyana Moskalkova “RIA” xəbər agentliyinə deyib ki, federal həbsxana xidmətindən kənar dörd həkim aprelin 20-də Navalnıya baş çəkib, onun səhhətində ciddi problem aşkarlanmayıb.

İrkutskda, Vladivostokda Navalnı tərəfdarları etirazlara yığışır. 160-dan çox şəhərdə etirazlar planlaşdırılır, məqsəd müxalifətçinin tələbinə diqqət çəkməkdir. Navalnı artıq üçüncü həftədir həbsxanada aclıq edir, müstəqil həkimlər tərəfindən müayinə olunmaq istəyir.(azpolitika)