Sabah Azərbaycan, Türkiyə, Gürcüstan və Bolqarıstan arasında “yaşıl enerji” sahəsində əməkdaşlığa dair Memorandum imzalanacaq.

Yenixeber.org xəbər verir ki, bunu Türkiyənin enerji və təbii sərvətlər naziri Alparslan Bayraktar bildirib.

Onun sözlərinə görə, Bolqarıstan, Türkiyə, Gürcüstan və Azərbaycan arasında inkişaf etdirilən layihədə, Azərbaycanda istehsal ediləcək elektrik enerjisinin Türkiyəyə və Türkiyə üzərindən Avropaya göndərilməsi ilə bağlı iş aparılır: “Bununla bağlı sabah Bakıda keçiriləcək Cənub Qaz Dəhlizi Məşvərət Şurası nazirlərin 11-ci və Yaşıl Enerji Məşvərət Şurası nazirlərin 3-cü iclasları çərçivəsində 4 ölkə arasında memorandum imzalanacaq”.

Nazir bildirib ki, 4 boru kəmərinə - Cənubi Qafqaz Boru Kəməri, Trans-Anadolu Qaz Boru Kəməri, Trans-Adriatik Qaz Boru Kəməri və Yunanıstan-Bolqarıstan İnterkonnektoruna elektrik ötürmə xətləri də əlavə olunur: “Təkcə təbii qaz və neft sahəsində deyil, elektrik enerjisi sahəsində də Türkiyə və Avropanın enerji təchizatı təhlükəsizliyinə töhfə verəcək yeni bir layihəni Azərbaycan ilə həyata keçirəcəyik".

A.Bayraktar Azərbaycanın bərpa olunan enerji sahəsində üzərinə götürdüyü rola işarə edərək, bu yolla əldə edilən elektrik enerjisinin istehlak nöqtələrinə çatdırılması məsələsində əməkdaşlıq ediləcəyini açıqlayıb.

Qeyd edək ki, “yaşıl enerji” sahəsində əməkdaşlığa dair Memorandum layihəsi 2025-ci il fevralın 7-də İstanbulda keçirilən dörd ölkənin nazir müavinlərinin üçüncü iclasında razılaşdırılıb.