Görüş zamanı layihənin başlıca məqsədləri, gənclər arasında ekokönüllülük fəaliyyətinin təşviqi və bu istiqamətdə məlumatlandırmanın vacibliyi xüsusi vurğulanıb. Layihənin icraçıları bildiriblər ki, ekokönüllülük yalnız ətraf mühitin qorunmasına deyil, eyni zamanda, gənclərin fərdi inkişafına və sosial məsuliyyət hissinin güclənməsinə də mühüm töhfə verir.

Tədbir iştirakçılarına COP-29 irsinin əhəmiyyəti və onun gələcək nəsillərin sağlam həyat tərzinin formalaşmasındakı önəmi ətraflı şəkildə izah edilib. Eyni zamanda, ekoloji biliklərin artırılması və ekokönüllülüyün prinsiplərinin genişlənməsinin təkcə yerli ekoloji problemlərin həlli üçün deyil, həmçinin qlobal iqlim böhranının aradan qaldırılması üçün mühüm rol oynadığı qeyd olunub.

Tədbir çərçivəsində iştirakçılar arasında ekokönüllülük mövzusunda fəal müzakirələr aparılıb. Gənclərin bu sahəyə marağını artırmaq üçün praktik nümunələr və tövsiyələr təqdim edilib. İştirakçılar, ekoloji məsələlərin həllində şəxsi təşəbbüslərin əhəmiyyətini anlayaraq, bu istiqamətdə daha aktiv olmağa çağırılıb.

Sonda vurğulanıb ki, ekokönüllülük mədəniyyətinin inkişafı təkcə Azərbaycanda deyil, bütövlükdə regionda ətraf mühit problemlərinin həlli prosesinə ciddi dəstək verə bilər. Layihə iştirakçıları, ekoloji maarifləndirmə və könüllülük təşəbbüslərinin gənclər arasında davamlı şəkildə təşviqinin əhəmiyyətini bir daha diqqətə çatdırıblar.