Rusiya Baxmuta nəzarəti ələ keçirsə, Kramatorsk və Slavyanska hücum üçün imkanlar açacaq.  

Yenixeber.org: Bunu Ukrayna prezidenti Volodimir Zelenski "Al Arabiya" telekanalına müsahibəsində deyib. 

O, müttəfiqlərin çağırışlarına baxmayaraq, Ukrayna ordusunun şəhərdən geri çəkilməkdən imtina etməsini belə izah edib: "Biz Baxmutdan geri çəkilə bilmərik, çünki bu, cəbhəni genişləndirəcək və rus qoşunlarına, "Vaqner"ə daha çox torpaqlarımızı ələ keçirmək şansı verəcək". 

Ukrayna prezidenti ölkədəki vəziyyəti də dəyərləndirib. “Vəziyyəti yaxşı adlandıra bilmərəm, amma mübarizə aparırıq. Biz bir il əvvəlkindən güclüyük”, - Zelenski bildirib. O, planlaşdırılan əks-hücumun təfərrüatlarını açıqlamayıb, lakin hücumun uğur qazanacağına əmin olduğunu vurğulayıb. 

Qeyd edək ki, Baxmutda 2022-ci ilin yayından başlayaraq şiddətli döyüşlər gedir. Döyüşlərdə Rusiyanın “Vaqner” muzdluları da iştirak edir. KİV-in məlumatına görə, Ukrayna və ABŞ arasında Baxmutun müdafiəsi ilə bağlı fikir ayrılığı var. Kiyev şəhərin müdafiəsinin davam etdirilməsi və əməliyyatın gücləndirilməsinin tərəfdarıdır. Ağ Evin fikrincə, Ukrayna Silahlı Qüvvələri üçün Baxmut strateji əhəmiyyət kəsb etmir.