Türkiyə prezidenti vurğulayıb ki, “bu riskli addım xüsusilə silah baronları üçün faydalıdır”.

Yenixeber.org”  TASS-a istinadən məlumat verir ki, Qərbin Kiyevə silah göndərməsi, o cümlədən tanklar Ukrayna münaqişəsinin həllinə gətirib çıxarmayacaq. Bu sözləri Türkiyə prezidenti Rəcəb Tayyib Ərdoğan çərşənbə günü TRT telekanalına müsahibəsində bildirib.

“Deyə bilmərəm ki, tankların göndərilməsini [Ukrayna münaqişəsinin] həlli istiqamətində bir addım hesab edirəm”. Biz Qərb ölkələrinin Ukrayna və Rusiya arasında danışıqlara dair çağırışlarımızı dəstəkləyəcəyini gözləyirik”.

Kiyevə silah tədarükünün artırılmasına gəlincə, Ərdoğan “bu riskli addımın xüsusilə silah baronları üçün faydalı olduğunu” vurğulayıb.

Bununla belə, NATO-nun baş katibi Yens Stoltenberq deyib ki, Ukraynaya silah tədarükü gələcəkdə “danışıqlar və sülh yolu ilə həll” üçün zəmin yarada bilər.

Yanvarın 25-də ABŞ Kiyevə 31 M1 Abrams tankı göndərməyi öhdəsinə götürdü. Həmin gün Almaniya 14 Leopard 2A6 tankını Ukraynaya təhvil verəcəyini və digər ölkələrin bu döyüş maşınlarını Ukraynaya təkrar ixracına icazə verəcəyini təsdiqləyib. Almaniyanın müdafiə naziri Boris Pistoriusun sözlərinə görə, “Leopard 2” tankları “martın sonuna qədər” Ukraynaya göndəriləcək. Norveç, Slovakiya, Böyük Britaniya, Polşa və Fransa da Kiyevə Qərb istehsalı olan tanklar verəcəklərini öhdələrinə götürdülər. Kiyev ilk partiya olaraq 12 ölkədən 140-a qədər tank alacağını gözləyir.

Kremlin sözçüsü Dmitri Peskov bildirib ki, Ukraynadakı vəziyyət ətrafında gərginlik Vaşinqtonun qərarları və ABŞ-ın digər ölkələrə təzyiqi səbəbindən artır.

Tərcümə etdi: Səadət Sultan