Rusiya Federasiyası sonrakı genişmiqyaslı hücum üçün çoxlu sayda kadr toplamaq yollarını axtarmağa davam edir.

“Yenixeber.org” unian.net-ə istinadən məlumat verir ki,  Rusiya hökuməti yeni səfərbərlik dalğası ehtimalını özündə saxlayır. Kreml Ukraynada planlaşdırılan genişmiqyaslı hücumdan əvvəl çoxlu sayda şəxsi heyəti toplamaq üçün yollar axtarır.

Bu tapıntılar Britaniya kəşfiyyatı tərəfindən Ukraynadakı müharibə ilə bağlı son hesabatda paylaşılıb. Orada deyilir: "2023-cü il yanvarın 22-də KİV-də Rusiya sərhədçilərinin iki pasporta malik qırğız əmək miqrantlarının Rusiyanı tərk etməsinə mane olması, onların adlarının səfərbərlik siyahılarında olması barədə məlumat yayılıb. Ayrı-ayrılıqda, 23 yanvar 2023-cü ildə Rusiya prezidentinin mətbuat katibi Dmitri Peskov bildirib ki, “qismən səfərbərlik” fərmanı qüvvədə qalır və bununla da Silahlı Qüvvələrin fəaliyyətinin təmin edilməsinin hələ də zəruri olduğunu əsas gətirir”.

Bu faktlara əsaslanaraq Britaniya kəşfiyyatı belə qənaətə gəlib ki, Rusiya hərbi xidmətə çağırışın yeni dalğasını keçirmək imkanını özündə saxlayır. Kreml Ukraynaya növbəti hücum üçün çoxlu sayda kadr toplamaq və eyni zamanda vətəndaşlar arasında daxili narazılığı minimuma endirmək yollarını axtarır.

Tərcümə etdi: Səadət Sultan