Vətən müharibəsinin qəhrəman hərbçilərindən biri, 2022-ci ilin sentyabrın 12-dən 13-nə keçən gecə Ermənistanın sərhəddə törətdiyi təxribatın qarşısını alarkən şəhid olan gizir Vadim Qocayevin yeni doğulan körpəsi xəstəxanadan evə buraxılıb.

Yenixeber.org: Körpənin evə yola salınması mərasimində Müdafiə Nazirliyinin rəsmiləri, şəhidin döyüş yoldaşları və ailə üzvləri iştirak edib.

Azərbaycan Tibb Universitetinin Tədris Cərrahiyyə Klinikasının Neonatalogiya şöbəsinin müdiri Aygün Rüstəmxanlı jurnalistlərə açıqlamasında bildirib ki, şəhidin övladı noyabr ayının 25-də doğulub: "Körpənin çəkisi 2 kq 900 qramdır. Dörd gün nəzarətimizdə olub, aktiv qidalanır, səhhəti yaxşıdır. Bu gün evə buraxılır və yaxın 2 həftə müddətində nəzarətimizdə qalacaq".

Vətən müharibəsinin iştirakçısı Elvin Rəsulov deyib ki, V.Qocayevlə uzun müddət bir yerdə xidmət edib: "Vətən müharibəsində də çiyin-çiyinə döyüşmüşük. Müharibədə mən yaralandım, amma Vadim xidmətini davam etdirirdi. O, övladının doğulmasını səbirsizliklə gözləyirdi. Zeyd ikinci övladıdır, bu gün həm də qızı İlaydanın bir yaşı tamam olur".

Şəhidin atası Alik Qocayev oğlunun şəhid olması xəbərini eşidəndən sonra ürək tutmasından vəfat edib.

Xatırladaq ki, V.Qocayev Vətən müharibəsi zamanı Azərbaycan torpaqlarının erməni işğalından azad olunması uğrunda gedən döyüşlərdə iştirak edib. Müharibədən sonra Prezident İlham Əliyevin sərəncamları ilə “İgidliyə görə” və “Cəbrayılın azad olunmasına görə” medalları ilə təltif edilib.

Dövlət başçısının 2022-ci il noyabrın 5-də imzaladığı digər sərəncama əsasən, ölkəmizin ərazi bütövlüyünün bərpa edilməsi uğrunda gedən döyüş əməliyyatlarında şəhid olmuş bir qrup hərbi qulluqçu təltif edilib. Həmin sərəncama əsasən, V.Qocayev "Azərbaycan Bayrağı” ordeni və “Vətən uğrunda” medalına layiq görülüb.

O, Azərbaycan Respublikasının ərazi bütövlüyünün bərpa edilməsi uğrunda gedən döyüş əməliyyatlarında iştirak edərək igidlik və mərdlik göstərdiyinə, hərbi hissə qarşısında qoyulan tapşırıqların icrası zamanı vəzifə borcunu şərəflə yerinə yetirdiyinə görə təltif edilib.