Yeni seçilmiş Prezident İbrahim Rəisinin andiçmə mərasiminə qatılmaq üçün İrana səfər edən Ermənistanın Baş naziri Nikol Paşinyan müxalifətin kəskin tənqidinə tuş gəlib.

Yenixeber.org: Ermənistan mətbuatına xəbər verir ki, müxalifət Paşinyanı İrana səfər etdiyinə görə yox, oradakı davranışlarına görə tənqid edib.

Belə ki, andiçmə mərasimindən paylaşılan fotodan da göründüyü kimi, Paşinyan rəsmi dövlət tədbirində öz mobil telefonunu qurdalamaqla məşğuldur. Ermənilər Baş nazirin bu hərəkətinin Ermənistan üçün strateji əhəmiyyət daşıyan və onu hər zaman dəstəkləyən İrana qarşı hörmətsizlik hesab edirlər.

Ermənistanın müxalif Respublika Partiyasının sədr müavini Armen Aşotyan özünün sosial şəbəkə səhifəsində bu hadisə ilə bağlı yazıb: “Bu axmaq başa düşmür ki, diplomatiya, mədəniyyət, tərbiyə, məsuliyyət nədir. Xüsusilə də Şərqdə bu cür açıq hörmətsizlik və tərbiyəsizlik unudulmur və bağışlanılmır”.

Göründüyü kimi, Paşinyanın İran rəhbərliyinə qoyduğu “hörmət” hətta ermənilərin özlərini belə qəzəbləndirib. Rəsmi Tehran isə yəqin ki, ərköyün və sevimli qonşusunun rəhbərinin səfərindən və davranışlarından yerlə göy qədər razıdır...