Xeberinfo.com:   “Regionda böyük oyunlar gedir. "Qazprom" şirkətinin bizə qazı 200 və yaxud 180 dollara satacağı məni narahat etmir. Narahat edən Rusiyanın Ermənistanın izolyasiyasını Gürcüstan vasitəsi ilə pozmaqla Azərbaycana "soyuq müharibə" elan etmək istəyidir. Bütün Rusiya Azərbaycanın əleyhinə işləyir. Azərbaycanın arxasında Türkiyə, Türkiyənin arxasında isə NATO dayanır. Bəs arxamızda kim var? Heç kim!".

Məlumata görə, bunu gürcü politoloqu Soso Tsinsadze "Aliya" qəzetinə müsahibəsində deyib.

"Azərbaycan bunu bizə bağışlamaz. Qaz məsələsi Azərbaycan üçün prinsip məsələsidir. Azərbaycanın milli valyutası dəyərini itirir. Rusiya isə bundan Azərbaycan əleyhinə istifadə edir", - deyə politoloq qeyd edib.

Onun sözlərinə görə, Azərbaycanın Türkiyəyə dəstək verməsi Rusiyanı qəzəbləndirib və Rusiya bunu bağışlamaq istəmir. "Putin revanş götürür və biz də bu işə cəlb olunmuşuq”.

Politoloq "Qazprom" şirkəti ilə müqavilənin bağlanacağı halda Gürcüstanın təhlükəli vəziyyətlə üzləşəcəyini bildirib: "Müqavilə bağlansa, Gürcüstan tranzit funksiyasını və Azərbaycan kimi strateji müttəfiqini itirəcək, diplomatik manevr imkanlarımız məhdudlaşdırılacaq”.