Yenixeber.org: “TASS” dövlət agentliyi Rusiya Milli qvardiyasının ictimaiyyətlə əlaqələr şöbəsinə istinadən belə məlumat yayıb.
Verilən xəbərə görə, İran Polis qüvvələrinin komandanı Əhmədrza Radan qvardiya komandiri Viktor Zolotovla görüşündən sonra “hüquq mühafizəsi, mühüm dövlət obyektlərinin mühafizəsi, terrorizm və ekstremizmə qarşı mübarizə, cinayətlərə qarşı mübarizə tədbirlərinin dəstəklənməsi” sahəsində təcrübə mübadiləsinə dair anlaşma memorandumu imzalanıb. Memorandum və onun mümkün icrası haqqında ətraflı məlumat dərc olunmayıb. Radan və Zolotov sözügedən sahələrdə “əməkdaşlıq şərtləri” haqqında fikir mübadiləsi aparıblar.
İslami Təbliğat təşkilatına bağlı “Mehr” agentliyi Əhmədrza Radanın səfər çərçivəsində Rusiya Milli Təhlükəsizlik şurasının katibi Nikolay Patruşev və Rusiya Daxili İşlər nazirinin birinci müavini Aleksandr Qorovoyla da görüşdüyünü yazıb.
Moskva ilə İran Suriyadakı müharibə fonunda sonra hərbi əməkdaşlığı xeyli dərinləşdirdilər. Rusiyanın Ukraynaya hərbi müdaxiləsindən sonra isə İranın pilotsuz kamikadze təyyarələrinin Rusiyaya göndərilməsi ilə bu əməkdaşlıq daha da genişləndirildi.
Ötən il İrandakı etiraz aksiyaları zamanı Ağ evin Ali Milli Təhlükəsizlik şurasının sözçüsü Con Kirbi İran xalqının etirazlarını yatırmaq üçün Rusiyanın Tehranın teokratik rejiminə kömək etməyi və xüsusilə İranın polis və təhlükəsizlik qüvvələrinə “repressiya təlimi” keçməyi planlaşdırdığını bildirdi.
Qeyd edək ki, 2016-cı ildən bəri İranla Rusiyanın polis və təhlükəsizlik əməkdaşlığı da genişlənib. İki ölkənin polis komandirləri isə Tehranda və Moskvada dəfələrlə görüşüblər.