Gürcüstanın siyasi gündəmi “Xarici agent” qanununun parlamentdə müzakirəyə çıxarılması səbəbilə silkələnməyə başlayıb.

Yenixeber.org: Artıq qonşu ölkənin parlamentində anti-Qərb mövqeyi ilə seçilən “Xalqın gücü” hərəkatının müzakirəyə çıxardığı sözügedən qanun deputatlar arasında qarşıdurmaya səbəb olub.

Eyni gərginlik bütünlükdə Gürcüstan siyasi mühitində hökm sürməkdədir və bunun küçə nümayişlərinə, ciddi etirazlara səbəb olacağı gözlənilir. Məsələ ondadır ki, qanun layihəsinin əleyhdarları onun Rusiyadakı analoji qanunla eyni mahiyyət daşıdığını və söz azadlığının, demokratiyanın, müstəqil QHT-lərin boğulmasına yönəldiyini bildirirlər.

Çünki bu qanun siyasi, demokratik, vətəndaş cəmiyyəti təsisatlarının xaricdən qrant almasını, maliyyələşməsini məhdudlaşdırır və belə qurumları, şəxsləri “xarici agent” elan edir.

Artıq Gürcüstan Prezidenti Salome Zurabişvilinin qanun parlamentdən keçəcəyi təqdirdə belə, ona veto qoyacağı gözlənilir. Əksər müşahidəçilər bu qanunu hökumətin rusiyapərəstliyinin göstəricisi və Gürcüstanı avropadan uzaqlaşdırmaq, diktatura mahiyyətli hakimiyyət bərqərar etmək cəhdi kimi dəyərləndirirlər.