İslamçı qruplaşmaların Dəməşqə hücumuna görə Suriya prezidenti vəzifəsindən istefa verən Bəşər Əsəd bildirib ki, vətəndaş müharibəsi və ondan sonrakı hadisələr zamanı heç vaxt istefa vermək və sığınacaq istəmək imkanını düşünməyib. 

Yenixeber.org: Xarici KİV-lərin yaydığı xəbərə görə, o iddia edir ki, dekabrın 8-i səhər tezdən - silahlı dəstələr paytaxta yaxınlaşanda - Dəməşqdə qalıb və yalnız həmin günün axşam saatlarında Suriyanı tərk edib. Bu, onun Ərəb Respublikasında hakimiyyət dəyişikliyindən sonra ilk açıq bəyanatıdır.

Bəşər Əsədin mətbuat xidmətinin Telegram kanalında yaydığı açıqlamada, yaraqlıların Dəməşqə girməsindən sonra Suriyanın Latakiya əyalətinə (Rusiyanın Xmeymim hava bazası orada yerləşir) "Rusiya müttəfiqləri ilə koordinasiyada və döyüş əməliyyatlarını daha da izləmək üçün" getdiyini və axşam Rusiyaya uçduğunu söyləyib.

Bəşər Əsədin sözlərinə görə, o, paytaxtın silahlılar tərəfindən zəbt edilməsindən Dəməşqi tərk etdikdən sonra xəbər tutub. O, “terrorçular” tərəfindən ələ keçirilən ölkədə prezident olaraq qalmağı mənasız hesab edib. Bəşər Əsədin dediyinə görə, onun gedişindən əvvəl “son hərbi mövqelərin dağıdılması və bunun nəticəsində bütün dövlət qurumlarının iflic olması” baş verib. “Mənim Suriyanı tərk etməyim planlaşdırılmamışdı və bəzilərinin iddia etdiyi kimi döyüşlər davam edərkən son saatlarda baş vermədi”, - o vurğulayıb.