Kared Kuşnerin Yaxın Şərqin bir çox liderləri ilə yaxşı münasibətləri var

Yenixeber.org: ABŞ-ın yeni seçilmiş Prezidenti Donald Trampın kürəkəni Kared Kuşner yeni administrasiyanın Yaxın Şərqdəki səylərində əsas rol oynayacaq. Bu barədə CNN öz mənbələrinə istinadən məlumat yayıb.

Mənbə qeyd edib ki, Kuşner çətin ki, rəsmi vəzifə tutsun, lakin Trampın regiondakı siyasətində “əsas fiqur” olacaq. Belə ki, Ağ Evin yeni rəhbərinin kürəkəninin Yaxın Şərqin bir çox liderləri ilə yaxşı münasibətləri var.

Bundan əvvəl “Financial Times” Trampın kürəkəninin respublikaçıların yeni administrasiyası dövründə Ağ Evə qayıtmayacağını yazıb. Qəzet qeyd edib ki, Kuşner əvvəlki səlahiyyət müddətində ABŞ Prezidentinin baş müşaviri olub və İsrail, BƏƏ, Bəhreyn, Sudan və Mərakeş də daxil olmaqla bir sıra ərəb dövlətləri arasında diplomatik əlaqələr quran “İbrahim razılaşması” danışıqlarında əsas rol oynayıb.

Kuşner bir neçə dəfə hökumətə qayıtmaqda maraqlı olmadığını bildirib, lakin Trampın qələbəsi və Yaxın Şərqdəki hazırkı böhran onun fikrini dəyişməsinə səbəb ola bilər.