Yenixeber.org: Qabriel Boriç Çilinin tarixində ən gənc prezident oldu. Solçuların “Ləyaqəti dəstəkləyirəm” koalisiyasının 35 yaşlı namizədinə prezident seçkilərinin ikinci turunda seçicilərin 55%-i səs verdi. Siyasətə tələbə hərəkatından gəlmiş Boriçin əsas seçkiqabağı vədlərindən biri sosial bərabərsizliklə mübarizədir. O, zənginlər üçün daha böyük vergi dərəcələrinin tətbiqini və özəl təqaüd fondlarından imtinanı təklif edib.

“Mən özümü ədalət, demokratiyanın genişlənməsi, insan haqları və azadlıqlarının müdafiəsi uğrunda mübarizə aparanların keçdikləri uzun tarixi yolun davamçısı hesab edirəm. Bu böyük ailəni yenə bir yerdə görmək istəyirəm, çünki biz yeni tarixi dövrün başlanğıcındayıq,” — deyə Qabriel Boriç bildirib. 

Seçkilərin nəticəsinə Boriçin rəqibinin reaksiyası da çox maraqlı olub. Ultrakonservativ siyasətçi Xose Antonio Kast sağ təmayüllü partiyaların namizədi idi, onu hakim qüvvə — “İrəli, Çili” alyansı dəstəkləyirdi. Bununla belə, Kast seçicilərin 45%-nin səsini qazana bilib. 

“İlk növbədə mən Qabriel Boriçi təbrik etmək istəyirəm, — uduzmuş namizəd deyib. — O, bizim hörmətimizə layiqdir, böyük üstünlüklə qələbə qazandı, çilililərin çoxu ona etimad göstərdi və ümid edirik ki, o, yaxşı hökumət quracaq. Öz tərəfimizdən isə biz, aramızdakı mövqe fərqlərinə baxmayaraq, əlimizdən gələni edəcəyik ki, ölkənin inkişafına tövhə verə bilək”. 

Çilidə seçkilər koronavirus pandemiyasının və sosial gərginliyin yaratdığı böhran şəraitində keçib. Bu böhran etiraz tədbirləri və iğtişaşlarla, hökumətlə radikal qruplaşmalar arasında münaqişələrlə müşayiət olunub.