AZ
RU
Ukraynadakı Azərbaycan diasporunun rəhbəri ölkədən qaçdı
Ukraynanın Luqansk şəhərindəki Azərbaycan cəmiyyətinin sədri Rasim Uğurluyev həyatına yaranan ölüm təhlükəsi ilə əlaqədar bu ölkəni tərk edib.
"Xeberinfo.com": Məlumata görə, hazırda R.Uğurluyevin Azərbaycanda olduğu deyilir.
Onun Ukraynada istifadə etdiyi mobil telefona isə hazırda başqa adamlar cavab verərək deyiblər ki, Rasim Uğurluyev Azərbaycana gedib: “O, son vaxtlar burada separatçılar tərəfindən ölümlə hədələnirdi”.
Xatırladaq ki, R.Uğurluyev bu il noyabrın 3-də Publika.az-a verdiyi müsahibədə də ölüm təhlükəsi ilə üzləşdiyini demişdi: “Mənim həyatıma da təhlükə yaranıb. Hazırda bölgədə olan bütün separatçılar məni axtarır, ailə üzvlərimin siyahısını hazırlayıblar. Çünki separatçıların əməlləri ilə bağlı bütün məlumatları Azərbaycan mediasına mən ötürürəm və özümə düşmən qazanmışam. Bununla bağlı səfirliyə də xəbər vermişəm”.
