Mişel Barnye hökumətinin devrilməsindən beş gün sonra Emmanuel Makron yeni Baş nazir tapmaq üçün məsləhətləşmələrə başlayıb. O, Yelisey Sarayında ardıcıl olaraq Liot qrupunun müstəqil deputatları, Marin Tondelyerin başçılıq etdiyi ekoloqlar, həmçinin Fabyən Russelin ətrafındakı kommunistlər ilə görüşüb, hər qrupla bir saatlıq danışıqlar aparıb.

Yenixeber.org: Məlumata görə, öz düşərgəsi tərəfindən sıxışdırılan Prezident Makron 51 günə seçdiyi Mişel Barnyedən fərqli olaraq, bu dəfə tez qərar verməlidir. Potensial namizədlər arasında Fransua Bayru, Sebastyən Lekornu və Bernar Kaznövün adları hallanır. Fransua Bayru özünü bu çətin vəziyyətdən çıxmağa “kömək etməyə” hazır göstərir. Müxalifətdə olan Jan-Lüc Melonşon isə sosialistlər Emmanuel Makronla müqavilə bağlayacaqları təqdirdə, “Yeni Xalq Cəbhəsi”nin onlarsız davam edəcəyi ilə hədələyir. O, dövlət başçısına güzəştlər təklif edən sosialistlərin rəhbərinin strategiyasını pisləyir.

Jan-Noel Barro sabiq Avropa və xarici işlər üzrə naziri və “MoDem” partiyasının vitse-prezidenti Fransua Bayrunun Baş nazir olmaq üçün bütün lazımi keyfiyyətlərə malik olduğunu bəyan edib. Barnye hökumətinin süqutundan sonra Fransanın hələ də hökumət başçısının olmaması fonunda F.Bayru bu vəzifə üçün getdikcə daha çox nəzərdən keçirilir. Lakin onun namizədliyi solçular tərəfindən tamamilə rədd edilir.