Yenixeber.org:  Bu barədə KİV-ə sızdırılmış məxfi sənədlərdə bildirilib.

Nəşrin məlumatına görə, ukraynalı general Kiril Budanov rəhbərlik etdiyi Hərbi Kəşfiyyat İdarəsi rəsmilərini fevralın 24-də bütün mümkün vasitələrlə Rusiya ərazisində “düşmənin dərinliklərinə” kütləvi zərbələr endirmək göstərişi verib. ABŞ Milli Təhlükəsizlik İdarəsinin məxfi sənədlərinə görə, əsas zərbələrdən biri Rusiyanın Qara dəniz sahilindəki liman şəhəri Novorossiysk olmaqla törədilməsi planlaşdırılıb. Nəşrin məlumatına görə, bu əməliyyat Ukraynanın ölkə sərhədlərindən kənarda əməliyyat planlaşdırmaq qabiliyyətini də nümayiş etdirməli idi.

Bununla belə Vaşinqtonda ukraynalıların planları gizli şəkildə müşahidə edən ABŞ rəsmiləri bu cür kütləvi zərbənin Kremli aqressiv reaksiya verməyə təhrik edəcəyindən narahat olublar.

Fevralın 22-də, müharibənin ildönümündən iki gün əvvəl ABŞ Mərkəzi Kəşfiyyat İdarəsi (CIA) gizli sənədlər yayaraq Ukrayna Hərbi Kəşfiyyat İdarəsinin Vaşinqtonun zərbələri təxirə salmaq tələbini qəbul etdiyini açıqlayıb.

Məqalədə eyni zamanda, ABŞ-ın general Kiril Budanovu gizli şəkildə izlədiyi, lakin sonuncunun bundan xəbərdar olduğu, bu səbəblə kabinetində bəzən musiqi açdığı və statik səslərdən istifadə etdiyi qeyd edilib.

Nəşrin məlumatına görə, Ukrayna Rusiya ərazisi ilə yanaşı Moskvanın əsas hərbi podratçısı “Wagner”ə qarşı Malidə və kürdlərin köməyi ilə Suriyada əməliyyatlar həyata keçirməyi planlaşdırıb.