Vladimir Putin Ukraynada Rusiya qoşunlarının fevral və ya mart aylarında başlaya biləcək yeni hücumu hazırlayır.

“Yenixeber.org”  ru.slovoidilo.ua-ya istinadən məlumat verir ki, Putin həm də ölkəsini ABŞ və müttəfiqləri ilə uzunmüddətli münaqişəyə hazırlayır.

Bu barədə Rusiya rəsmiləri, müşavirləri və vəziyyətlə tanış olan digər şəxslər də məlumat yayıb.

Analitiklərin fikrincə, hətta Putin Rusiya ordusunun zəif tərəflərini inkar edə bilməz, çünki onun qoşunları Ukraynaya genişmiqyaslı işğalın əvvəlində ələ keçirilən ərazilərin yarıdan çoxunu itirib. Davamlı uğursuzluqlar Kremldə bir çoxlarının “öz ambisiyaları barədə qeyri-real davranmağa, hətta indiki cəbhə xəttini saxlamağın da nailiyyət olacağını qəbul etməyə” səbəb olub.

Eyni zamanda, mənbələrə görə, Putin əmindir ki, Rusiyanın üstün gücü və İkinci Dünya Müharibəsindən bəri ən pis itkiləri almaq istəyi ona “əvvəlki uğursuzluqlara baxmayaraq, qalib gəlməyə” imkan verəcək.

Mənbələr bildirir ki, Rusiya artıq fevral-mart aylarında hücumu bərpa edəcək. Onların sözləri Ukrayna və müttəfiqlərinin xəbərdarlıqlarını təsdiqləyir.

Putin hesab edir ki, onun ABŞ və müttəfiqləri ilə “ekzistensial münaqişədə” qalib gəlməkdən başqa alternativi yoxdur. Bundan əlavə, yazda Rusiyada yeni səfərbərlik dalğası başlaya bilər.

Tərcümə etdi: Səadət Sultan