“Yenixeber.org” “İzvestiye.ru”ya istinadən xəbər verir ki, Vaşinqton imtinanı texniki səbəblərlə izah edərək, Kiyevə Abrams tanklarını tədarük etməyi planlaşdırmır. Bu barədə yanvarın 5-də adı çəkilməyən amerikalı məmura istinadən “The Washington Post” qəzeti yazıb.

Məqalədə deyilir ki, ABŞ prezident administrasiyası hələ də “Abrams” ağır tanklarının Ukraynaya verilməsini istisna edir, çünki onlar “böyük sürətlə” yanacaq sərf edən turbin mühərriki ilə işləyir, həm də nasazlıqlara meylli olur və texniki xidmətdə böyük təcrübə tələb edir.

Bir gün əvvəl, yanvarın 4-də Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi bildirib ki, ABŞ yaxın günlərdə və həftələrdə Ukraynaya yeni hərbi yardım göstərmək niyyətindədir. Onun sözlərinə görə, Vaşinqton hərbi əməliyyatların tez bitəcəyini gözləmir. O, bildirib ki, yeni hərbi yardım paketlərinə HIMARS MLRS-nin əlavə qurğuları da daxil olacaq.

Nəşrin məlumatına görə, Ağ Ev hesab edir ki, ATACMS-dən istifadə Rusiya ilə qarşıdurma kontekstində çox təhlükəlidir, çünki bu raketlər 300 km-ə qədər məsafəni qət etməyə qadirdir.

Dekabrın 21-də ABŞ dövlət katibi Entoni Blinken Patriot hava hücumundan müdafiə sisteminin Kiyevə yeni hərbi yardım paketinə daxil edildiyini açıqlayıb. Bildirilir ki, təxminən 1,85 milyard dollar məbləğində vəsait də ayrılacaq.