“Əgər biz Ukraynanın yanında olsaq və Ukraynanı ona lazım olan silahlarla təmin etsək, Ukrayna Putini dayandıra bilər”.

Yenixeber.org: Bunu ABŞ Prezidenti Co Bayden ölkə Konqresinə müraciətində deyib.

Prezident qeyd edib ki, Ukraynaya dəstək verilməsi ABŞ-nin qlobal liderlik vəzifəsindən irəli gəlir: “Ukraynaya yardım qlobal liderlikdən uzaqlaşmaq istəyənlər tərəfindən əngəllənir. Biz geri çəkilə və bütün Avropanı riskə ata bilmərik. Mən Putinə çox sadə şeylər dedim: Biz geri çəkilməyəcəyik. İndi, əvvəllər dediyim kimi və sözün əsl mənasında bunu nəzərdə tuturam - tarix bizi izləyir. Tarix Nümayəndələr Palatasını izləyir”.

Bayden azadlıq və demokratiyanın “həm daxildə, həm də xaricdə” təhdid altında olduğunu deyərək, ABŞ-nin Ukraynaya yardımı davam etdirməsinə çağırış edib.

O, bildirib ki, bu çıxışının məqsədi “Konqresi ayıltmaq və Amerika xalqını demokratiyanın təhlükə altında olması barədə xəbərdar etməkdir”: “Burada kimsə Putinin Ukraynada dayanacağını düşünürsə, sizi əmin edirəm ki, dayanmayacaq. Biz Putinin çağırışına cavab verməliyik”.

Prezident təkrar edib ki, Ukrayna Rusiyaya qarşı döyüşmək üçün hərbi yardım və silah istəyir, Amerika əsgərlərinin orada döyüşməsini yox: "Onlar Amerika əsgərlərini istəmirlər. Əslində, Amerika əsgərləri Ukraynada döyüşmürlər və mən bunu belə saxlamaqda qərarlıyam... Həyatım mənə azadlıq və demokratiyanı qəbul etməyi öyrətdi. Amerikanı müəyyən edən əsas dəyərlər üzərində qurulmuş gələcək dürüstlük, ləyaqət və bərabərlikdir. Hər kəsə hörmət edin. Hər kəsə ədalətli şans verin. Nifrətə sığınacaq verməyin. İndi mənim yaşımda olan bəzi insanlar fərqli bir hekayə görürlər: Amerikanın inciklik və qisas hekayəsi. Bu, mənə aid deyil”.(Azpolitika)

C.Məmmədov