Tovuzda xurma bağlarında məhsulun yığımı aparılır.

Yenixeber.org: Bu il alıcılıq qabiliyyətinin azalması və qiymətlərin xeyli aşağı olması fermerləri çətin vəziyyətə salıb.

Fermer Rafiq Nəsibov bu il 10 tona qədər məhsul yığıb. Lakin məhsulun yarısını hələ sata bilməyib. Xurmanın bu növünə, yəni el arasında “şiş burun” adlanan xurmaya ötən illərlə müqayisədə demək olar ki, tələbat yoxdur.

Hazırda xurmanın bir kiloqramı təxminən 30-33 qəpikdir. Qablaşdırılan səbətlər və yeşiklərdə xurmanın tutumu 7-10 kiloqram arasındadır. Elə satış da qablarda gerçəkləşdirilir. Xurmanın tez xarab olan meyvə olduğunu nəzərə alsaq, bağ sahiblərinin narahatlığı başa düşüləndir. İmkanı olan məhsulunu soyuducu anbarlarda saxlasa da, bunu edə bilməyənlərin məhsulları elə bağlarda batır. Digər mövsüm meyvələri kimi bu il xurmanın da alıcısız qalmasının əsas səbəbi məhsulun Rusiya bazarına çıxarıla bilməməsidir.

Qeyd edək ki, Tovuzda 288,6 hektar xurma bağı var. Onun 251 hektarı bar verən bağlardır. Orta məhsuldarlıq 1 hektar üzrə 265 sentner təşkil edir.