“İstədim ki, Heydər Əliyev Fondundan pul alıb, rayon rəhbərliyinə verim ki, mənə örüş sahəsi ayırsınlar”

Yenixeber.org: Redaksiyamıza Goranboy rayonu Aşağıballıqaya kənd sakini İsmayılov Vahid Yunis oğlunun müraciəti daxil olub. Müəllif müraciətində rayon rəhbərliyi və bələdiyyə sədri tərəfindən qarşılaşdığı haqsızlıqlardan bəhs edir. Heyvandarlıq təsərrüfatı üçün örüş sahəsi almaq istəyi daşa dəyib... Aktuallığını nəzərə alıb, müraciəti müəyyən ixtisarla dərc edirik:

“Bildirirəm ki, mən uzun illərdir ki, rayon rəhbərliyindən örüş sahəsi ala bilmirəm. Məsələ ilə bağlı rayon rəhbərliyinə pul vermək üçün Mehriban xanımdan pul istəmişdim. İstədim ki, Heydər Əliyev Fondundan pul alıb, rayon rəhbərliyinə verim ki, mənə örüş sahəsi ayırsınlar.

01.06.2017-ci il tarixdə teleqramla Fonddan pul istəmişəm. Mənim bu addımı atmağım səbəbsiz deyil. 12.11.2015-ci il tarixdə akt tərtib etdilər. Guya mənə örüş sahəsi ayırdılar. 10 ha. və 20 ha. torpaq sahəsini yalnız kağız üzərində ayırdılar. Sonra Bələdiyyə sədri Allahverdiyev Məzahir məndən 5 min manat pul istədi. Pulum olmadığından örüş sahəsini vermədilər. Bu məqsədlə rayon Baytarlıq İdarəsinə rüsum da ödəmişəm.

Cənab baş redaktor, xahiş edirəm mənim bu problemimin həll olunmasına köməklik göstərəsiniz və bu müraciətimin ictimailəşdirilməsini təmin edəsiniz”.

Redaksiyadan: Müraciətdə yer alan iddialarla bağlı qarşı tərəfi dinləmək istiqamətindəki cəhdlərimiz nəticəsiz oldu. Qarşıdakı günlərdə mövzunu davam etdirəcəyik.