Türkiyə prezidenti Rəcəb Tayyib Ərdoğanla Milliyətçi Hərəkat Partiyasının (MHP) lideri Dövlət Baxçalının dünənki görüşündə diqqət çəkən mövzular müzakirə olunub.
Yenixeber.org: Ərdoğanın yenidən prezidentliyə namizədliyi ilə bağlı konstitusiya dəyişikliyi təklifi Türkiyə mediasında ən çox danışılan mövzulardan birinə çevrilib.

Media Ərdoğanın fevralın 6-da ürək qapağı dəyişdirilən Baxçalı ilə dünən öz iqamətgahında 35 dəqiqəlik söhbəti gündəm edib.

Prezident Ərdoğan və Baxçalı bu il ikinci dəfədir görüşürlər. Yanvarın 9-da Baxçalının iqamətgahında keçirilən ilk görüş təxminən 40 dəqiqə sürmüşdü. Prezident Ərdoğanın avqustun 30-da “Daxili cəbhəmizi möhkəm tutaq” mesajından sonra Dövlət Baxçalı Türkiyə Böyük Millət Məclisində etdiyi tarixi İmralı çağırışı ilə yeni prosesə start verib.

Liderlərin 117 gündən sonra dünənki görüşündə əsas gündəm “Terrordan azad Türkiyə” hədəfinə doğru atılacaq addımlar, PKK-nın özünü dağıtma prosesi, Suriya və İraqda terrorla mübarizə əməliyyatları olub.

Baxçalının daha əvvəl bəyan etdiyi “Prezident Ərdoğanın yenidən namizədliyini irəli sürmək üçün konstitusiya dəyişikliyi təklifi” ittifaq tərəfdaşları arasında ən çox müzakirə olunan mövzuya çevrilib.