Ermənistanda “Metsamor” Atom Elektrik Stansiyasının keçmiş baş direktoru 1 milyon dollardan (1,7 milyon manat) çox pul mənimsəyib.

Yenixeber.org: Bu barədə Ermənistan Baş Prokurorluğu məlumat yayıb.

İstintaqın məlumatına görə, 2002-2014-cü illərdə baş direktor postunu tutan Qaqik Markosyan 380 milyon dramdan (1,5 milyon manatdan) çox pul mənimsəyib.

Belə ki, 2011-ci ildə baş direktor əsassız olaraq Rusiyanın “NovEnerqoProm” şirkətindən armatur dəstini natamam şəkildə (14 vahid) əsassız yüksək qiymətə (33,54 milyon rubl/812,8 min manat) alıb.

Alınan məhsullar istifadə olunmayıb, anbarda qalıb və zaman keçdikcə yararlılıq müddəti keçib.

2015-ci ildə AES məcbur qalaraq “Rusatom Servis”dən 592 000 dollara (921,4 min manat) tam komplekt (37 vahid) armatur dəsti alıb.

Dekabrın 22-də prokurorluğun təşəbbüsü ilə Markosyana qarşı proses başlayıb. İş Milli Təhlükəsizlik Bürosunun İstintaq İdarəsinə göndərilib.

Bu, Markosyana qarşı açılan ilk cinayət işi deyil. Hələ 2016-cı ildə Markosyan və AES-in keçmiş rəhbərliyinin digər nümayəndələri xüsusilə irimiqyaslı mənimsəmədə ittiham olunublar.

Qeyd edək ki, Ermənistanda texniki və mənəvi cəhətdən köhnəlmiş “Metsamor” Atom Elektrik Stansiyasının (AES) hazırda da fəaliyyət göstərməsi yalnız Azərbaycan və Ermənistan üçün deyil, həm də bütün bölgə üçün ciddi təhlükə mənbəyidir. Bu isə o deməkdir ki, regionun hər bir ölkəsi Çernobıl və Yaponiyanın Fukuşima AES-lərinin aqibətini yaşamaq riski ilə üz-üzədir. Müxtəlif beynəlxalq təşkilatların və atom sahəsi üzrə mütəxəssislərin artıq istismar müddəti bitmiş “Metsamor” AES-i “bütün bölgə üçün təhlükə” adlandıraraq xəbərdarlıq etmələrinə baxmayaraq, Ermənistan nəinki stansiyanın fəaliyyətini dayandırmır, əksinə onun fəaliyyəti 2026-cı ilə və ondan sonrakı müddətə uzadılıb.

Yeri gəlmişkən, Avropa İttifaqının Xarici Əlaqələr və Təhlükəsizlik Siyasəti üzrə Ali Nümayəndəsinin (Aİ Komissiyasının) Ermənistan üzrə tərəfdaşlığın implementasiyası haqqında 2022-ci il 17 may tarixli hesabatında da qeyd edilib ki, “Metsamor” AES nüvə təhlükəsizliyi üzrə beynəlxalq səviyyədə qəbul edilmiş standartlara tam cavab verəcək formada təkmilləşdirilə bilməz və buna görə də onun bağlanması və təhlükəsiz şəkildə istismardan çıxarılması tələb olunur.

Azərbaycanın İnsan Hüquqları üzrə Müvəkkili (Ombudsman) Ermənistanın Azərbaycana qarşı törətdiyi müharibə və ekoloji cinayətlərlə bağlı beynəlxalq insan hüquqları təşkilatlarına müraciət edib.(“Sputnik” Ermənistan")