Ermənistanın Baş naziri Nikol Paşinyanla Erməni Apostol Kilsəsi arasındakı gərginlik yeni səviyyəyə yüksəlib.

Yenixeber.org: Kilsənin sözçüsü Zareh Aşuryan Paşinyanın guya sünnət olunduğunu iddia edib və onun “əsl xristian olmadığını” bildirib.

Paşinyan isə bu iddiaya sərt və qeyri-adi cavab verib: "İstəsəniz göstərə bilərəm".

Baş nazir, həmçinin Kilsə rəhbəri II Qareginin subaylıq andını pozaraq uşaq sahibi olduğu barədə əvvəlki iddiasını da bir daha təkrarlayıb.

Gərginliyin fonunda Ermənistan hökuməti 25 iyun tarixində çevriliş cəhdinin qarşısının alındığını açıqlayıb. Paşinyan özünün "Telegram" kanalında yaydığı bəyanatda bildirib: “Cinayətkar-oliqarx məmurlar tərəfindən hazırlanmış böyük bir plan çökdürüldü”.

Təhlükəsizlik orqanları həmin gün 14 nəfəri, o cümlədən 2023-cü ildəki etirazların simasına çevrilmiş yepiskop Baqrat Qalstanyanı həbs edib. Onların “Müqəddəs Mübarizə” adlı hərəkatla əlaqəli olduqları və keçmiş hərbçi və polis əməkdaşlarından ibarət qrup vasitəsilə dövlət çevrilişi planlaşdırdıqları iddia edilir. Rəsmilər həmin şəxslərin internetin kəsilməsi, yol kəsilməsi və zorakılıqlar törətməyi planlaşdırdıqlarını bildirib.

İttihamların içində telefon danışığı qeydləri və silah görüntüləri də var. Ermənistan İstintaq Komitəsinin məlumatına görə, Qalstanyan 2024-cü ilin noyabrından etibarən hakimiyyəti qeyri-konstitusion yolla ələ keçirməyə çalışıb.