AZ
RU
Düşüncəm özümə niyə ar gəlir
Gülüşün çəkisi qəmlə ölçülər,
Kefinin düzəni dəmlə ölçülər,
Zəkanın nisbəti kəmlə ölçülər.
Baxıram, bu dünya mənə dar gəlir,
Düşüncəm özümə niyə ar gəlir?...
*****
Şair var qələmi güllü- çiçəkli,
Saplağı çürüksə yaşıl ləçəkli,
Libasıı əynində bərli- bəzəkli.
Misrası söyləyir, yenə yar gəlir,
Düşüncəm özümə niyə ar gəlir?
*****
Yazır ki, qış gəlir, amma zor gəlir,
Avazı pis deyil, amma xor gəlir,
Deyirəm, agah ol, yenə sor, gəlir.
İnsanın dərdi çox, ahu- zar gəlir,
Düşüncəm özümə niyə ar gəlir?
****
Suallar fırlanır daim başımda,
Cavablar dikəlib durur qarşımda.
Yazın siz, bunları qəbir daşımda,
Bilmişəm, axır ki, dünya dar imiş,
Bülbülə dərd olan əcəb XAR imiş...
*****
Dünyanın hər işi tərsə fırlanır,
Öyrənsən həyatı dərsə fırlanır,
Qaçsanda hayana ərşə fırlanır.
Bəlkədə, özümün könlü dar imiş,
Bu həyat bu üzdən mənə AR imiş!...
Təranə Şəms. 16.12.2023
