Dövrün dəyişməsi yenilik deyil
Yenixeberorg.com: Həyat insana əvvəlcədən xəbər vermir. Heç kim bu dünyaya göz açanda onu nələrin gözlədiyini bilmir. İnsan yaşadıqca, gördükləri ilə yoğrulur, zamanın içində formalaşır. Bəzən həyat onu dəyirman daşı kimi üyüdür — ələyir, sınayır, yenidən qurur.
Tarixə baxanda bunu aydın görürük.
1937-ci ilin repressiya dövründə Azərbaycanın neçə-neçə ziyalısı məhv edildi. Mikayıl Müşfiqin qəbri bu günə qədər tapılmayıb. Hüseyn Cavid sürgündə əzab çəkirdi, ailəsi isə baxımsızlıq içində dağılırdı. Onların “günahı” düşünmək, yazmaq, millətini sevmək idi.
İndi isə başqa bir dövrdə yaşayırıq. Deyirik ki, müstəqilik. Deyirik ki, inkişaf edirik. Amma bəzən qarşılaşdığımız mənzərələr insanı dayandırıb düşündürür — doğrudanmı yalnız zaman dəyişib?
Bu gün gündəmdə olan bir hadisə var.
Jurnalist, söz adamı, cəmiyyətin görən gözü olan Əvəz Zeynallı ağır xəstəliklə mübarizə aparır. Müalicəsini davam etdirmək üçün isə… öz kitablarını satmağa məcbur qalır. Akademiyanın bağında stol arxasında dayanıb, yazdıqlarını satır ki, yaşaya bilsin.
Bu mənzərə acıdır.
Daha da acı olan isə budur ki, bir ziyalı ayaqda qalmaq üçün xalqın dəstəyinə möhtacdır — və xalq onu tək qoymur. İnsanlar kitablarını alır, marafona qoşulur, əlindən tutmağa çalışır.
Bəs digərləri?
Hardadır bu cəmiyyətin sözə sahib çıxmalı olan qurumları?
Hardadır illərlə ədəbiyyat adına imtiyazlar əldə edənlər?
Hardadır əli pulla oynayanlar?
Bu sualların cavabı hamıya bəllidir. Sadəcə açıq deməyə ehtiyac yoxdur.
Bir cümlə var ki, hər şeyi deyir:
Əvəz Zeynallı bu xəstəliyi özü ilə təcridxanaya aparmamışdı.
Bu sözün altında nə varsa — hər kəs bilir.
Keçmişdə Hüseyn Cavidin ailəsi baxımsızlıqdan dağılırdı…
Bu gün isə başqa formada eyni ağrının izlərini görürük.
Zaman dəyişir, amma bəzi hadisələrin mahiyyəti dəyişmir.
Bu artıq təsadüf deyil — bu, düşündürücü paraleldir.
Bu gün Əvəz Zeynallıya dəstək olmaq təkcə insani borc deyil. Bu, həm də sözə, düşüncəyə, ziyalıya sahib çıxmaqdır.
Ey Azərbaycan vətəndaşı —
ziyalını qoru.
Çünki bir millətin onurğa sütunu onun düşünən insanlarıdır.

Məleykə Abid

ABŞ Prezidenti Donald Tramp bildirib ki, İsrail Vaşinqtonun İrana qarşı hərbi əməliyyat başlamaq qərarına təsir göstərməyib.

Yenixeberorg.com xəbər verir ki, bu barədə o, "Truth Social"da bildirib.

"İsrail heç vaxt məni İranla müharibəyə başlamağa razı salmayıb - bunu 7 oktyabrın (2023-cü il - HƏMAS-ın İsrailə hücumu) nəticələri, eləcə də İranın heç vaxt nüvə silahına malik olmamalı olduğuna dair mənim çoxdankı iddialarım etdi", - o yazıb.

Tramp, həmçinin KİV-i kəskin tənqid edərək, dərc olunan məlumatların əhəmiyyətli hissəsinin, o cümlədən müxtəlif sosioloji sorğuların əsaslı olmadığını bildirib. O iddia edir ki, onların dediklərinin 90%-i yalan və uydurmadır, sorğular isə "2020-ci il prezident seçkilərinin saxtalaşdırıldığı kimi" saxtalaşdırılıb.

"Medianın danışmağı sevmədiyi Venesueladakı nəticələrdə olduğu kimi, İrandakı nəticələr də heyrətamiz olacaq - və əgər İranın yeni liderləri ağıllı olsalar, ölkənin böyük və firavan gələcəyi ola bilər!", - o əlavə edib.

Azərbaycanın müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev ölkəmizdə səfərdə olan Türkiyə Milli Müdafiə Universitetinin rektor müavini professor Talat Canbolatın rəhbərlik etdiyi nümayəndə heyəti ilə görüşüb.

Yenixeberorg.com: Bu barədə Müdafiə Nazirliyi məlumat yayıb.

Bildirilib ki, türkiyəli qonaqlar əvvəlcə Fəxri xiyabanda Ümummilli Lider Heydər Əliyevin və görkəmli oftalmoloq-alim, akademik Zərifə xanım Əliyevanın məzarlarını, həmçinin Şəhidlər xiyabanı və Türk Şəhidliyini ziyarət edərək gül dəstələri qoyub, xatirələrini ehtiramla yad ediblər.

Azərbaycan Ordusunun Baş Qərargahında keçirilən görüşdə qonaqları salamlayan general-polkovnik K. Vəliyev Azərbaycan-Türkiyə münasibətlərinin tarixi köklərə söykəndiyini vurğulayaraq, bu əlaqələrin digər sahələrdə olduğu kimi hərbi təhsil sahəsində də inkişafının vacibliyini qeyd edib.

Bildirilib ki, hərbi təhsil sahəsində qarşılıqlı təcrübə mübadiləsi hərbi qulluqçuların bilik və bacarıqlarının artırılmasında mühüm rol oynayır.

Səmimi qəbula və göstərilən qonaqpərvərliyə görə təşəkkürünü bildirən professor T. Canbolat hərbi təhsil sahəsində əməkdaşlığın yüksək səviyyədə olduğunu qeyd edib.

Görüşdə hərbi təhsil sahəsində görülən birgə işlərin cari vəziyyəti və inkişaf perspektivləri, həmçinin qarşılıqlı maraq doğuran bir sıra mövzulara dair geniş fikir mübadiləsi aparılıb.

Belçika və Niderlandın Nümayəndələr Palataları 2026-cı il aprelin 16-da Azərbaycan-Ermənistan sülh prosesinə, hər iki ölkənin birgə səyləri ilə regionda sülh və əməkdaşlıq mühitinin formalaşmasına yönəlmiş addımlara zərbə vurmaq məqsədi daşıyan qətnamələr qəbul edib, Azərbaycanın Milli Məclisi isə bu addımı qınayıb.

Yenixeberorg.com xəbər verir ki, bu fikirlər Milli Məclisin məsələ ilə bağlı açıqlamasında yer alıb.

"Milli Məclis ölkəmizin suveren ərazisinə təhrif edilmiş formada istinad edən, saxta iddialar və əsassız ittihamlar üzərində qurulmuş bu birtərəfli və qərəzli sənədləri kəskin şəkildə qınayır və qətiyyətlə rədd edir", - açıqlamada qeyd olunub:

"Azərbaycan ilə Ermənistan arasında mövcud olmuş münaqişənin tarixini və nəticələrini təhrif edən, ənənəvi anti-Azərbaycan, islamofob dairələrin qeyri-sağlam və irqçi təxəyyülündən irəli gələn bu sənədlər beynəlxalq hüququn və qanunun aliliyinin kobud şəkildə pozulması, regionda davam edən və həssas mərhələdən keçən sülh prosesinə qarşı təxribatdır.

Bu sənədlərin xüsusilə Azərbaycan və Ermənistanın parlament sədrlərinin növbəti görüşünün keçirildiyi bir vaxtda qəbul edilməsi onların "təşəbbüskarları"nın regiondakı reallıqlardan uzaq olduqlarını, əsl niyyətlərinin sülh və dialoqu təşviq etmək deyil, məhz düşmənçiliyi və qisasçılığı qızışdırmaq olduğunu bariz şəkildə göstərir.

Belçika Nümayəndələr Palatasının qəbul etdiyi sənəddə tarixi Vaşinqton Sülh Sammitinə heç bir istinadın olmaması, Sammitin nəticələrinin, o cümlədən "Azərbaycan və Ermənistan arasında sülhün və dövlətlərarası münasibətlərin təsis edilməsinə dair Saziş"in paraflanmasının qeyd edilməməsi sənədin müəllifləri və onun lehinə səs verənlərin mövzu ilə bağlı "savadlılığı"nın və xroniki hal almış qərəzliliyinin daha bir əyani nümunəsidir.

Azərbaycan-Ermənistan sərhədində vəziyyəti hərbi baxımdan riskli hesab edən və bunu Avropa İttifaqının Ermənistandakı müşahidə missiyasının davamlı fəaliyyəti üçün əsas kimi qələmə verən sənəd müəlliflərinin qiymətləndirmələri, ilk növbədə, Ermənistanın rəsmi şəxslərinin ictimaiyyətə açıqlanan mövqeyi ilə ziddiyyət təşkil edir. Məhz Azərbaycan tərəfinin sülhə yönəlmiş addımları və məsuliyyətli davranışı nəticəsində son iki il sərhəddə hər hansı hərbi insidentin baş vermədiyi ən sakit dövr kimi xarakterizə olunur və bu, Ermənistan tərəfindən də təsdiq edilir.

Müharibə və insanlıq əleyhinə cinayətlər törətdiyi şəffaf və açıq hüquqi proses yolu ilə sübuta yetirilmiş şəxsləri "müharibə əsiri" kimi qələmə vermək və onların azadlığa buraxılmasını tələb etmək, hər şeydən əvvəl, sözügedən sənədlərdə istinad olunan beynəlxalq hüquq normalarına, insan hüquqlarına və qanunun aliliyinə qarşı qəsddir.

Məhkum edilmiş həmin şəxslərin istintaq və mühakimə prosesində bütün hüquqlarının qorunduğu, onlar üzərində məhkəmə prosesinin qanuniliyi müvafiq bitərəf beynəlxalq mexanizmlər tərəfindən təsbit edilmişdir. Bu kontekstdə, həmin şəxslərin azad edilməsi, habelə onların mühakimə prosesi ilə əlaqədar Azərbaycana qarşı tədbirlərin görülməsi ilə bağlı Ermənistan tərəfindən edilmiş müraciətlərin vaxtilə Beynəlxalq Ədalət Məhkəməsi tərəfindən bir neçə dəfə rədd edilməsi xüsusilə qeyd olunmalıdır.

Eyni qaydada, BMT İnsan Hüquqları Şurasının Əsassız həbslər üzrə İşçi Qrupunun 2025-ci il 13 mart tarixli müvafiq rəyində qeyd olunan şəxslərin Azərbaycan tərəfindən həbsinin və mühakiməsinin qanuniliyi təsbit edilmiş, həmin şəxslərin hüquqlarının pozulmasına dair iddialar təmin edilməmişdir.

Biz qeyd olunan əsassız çağırışların ünvanlandığı aidiyyəti dövlətlərin və Avropa İttifaqının ikitərəfli dialoq vasitəsilə qətiyyətlə irəlilədilən sülh prosesinə pozucu müdaxilədən çəkinəcəyini gözləyir, onları belə təxribatçı addımların təkrarlanmaması üçün zəruri tədbirlər görməyə dəvət edirik".

Milli Məclis Belçika və Niderland parlamentlərindən Azərbaycana qarşı nifrət kampaniyasına və regionda sülhün möhkəmləndirilməsi səylərinə zərbə vuran addımlara son qoymağı tələb edib. Bildirilib ki, bu addımlar hazırkı həssas mərhələdə yalnız sülh əleyhinə fəaliyyət göstərən revanşist qüvvələrin həvəsləndirilməsinə deyil, həm də Avropa İttifaqının regionla bağlı bəyan edilmiş təhlükəsizlik və iqtisadi maraqlarına xələl gətirilməsinə xidmət edir".

İranın xarici işlər naziri Abbas Əraqçi ilə pakistanlı həmkarı Məhəmməd İshaq Dar arasında telefon danışığı baş tutub.

Yenixeberorg.com xəbər verir ki, A. Əraqçi bu barədə özünün "Telegram" kanalında yazıb.

Söhbət zamanı regional hadisələr və İranla ABŞ arasında razılaşdırılan atəşkəslə bağlı məsələlər müzakirə olunub.

Macarıstanda parlament seçkilərində qalib gələn "Tisa" partiyasının lideri Peter Madyar xarici işlər naziri vəzifəsinə Anita Orbanı təyin edib.

Yenixeberorg.com xəbər verir ki, Madyar bu barədə bu gün mətbuat konfransında bəyan edib.

Onun sözlərinə görə, gələcək hökumətdə bir sıra əsas vəzifələrlə bağlı qərarlar artıq qəbul edilib.

Maliyyə naziri Andraş Karman, iqtisadiyyat və energetika naziri İştvan Kapitanya, səhiyyə naziri Jolt Hegeduş olacaq.

Müdafiə naziri vəzifəsini Romul Rusin-Szendi, Kənd Təsərrüfatı və Ərzaq İqtisadiyyatı Nazirliyinə isə Sabolç Bona rəhbərlik edəcək.

Təhlükəsiz rabitə avadanlığı, kortej üçün zirehli nəqliyyat vasitələri və əlavə texniki təchizatla yüklənmiş azı altı ABŞ hökumət təyyarəsi Pakistan Hərbi Hava Qüvvələrinin Ravalpindidəki "Nur Xan" aviabazasına eniş edib.

Yenixeberorg.com xəbər verir ki, təyyarələr yükü boşaltdıqdan sonra bazanın ərazisini tərk ediblər.

Əməliyyat yüksəkvəzifəli ABŞ nümayəndə heyətinin gözlənilən gəlişi ərəfəsində həyata keçirilib.

Qeyd olunub ki, aerodrom İslamabad üçün VIP qonaqların əsas qəbul məntəqəsidir.

Telekanalın məlumatına görə, bu təyyarələrdən ikisi bu gün, daha dördü isə son 48 saat ərzində eniş edib.

Xatırladaq ki, fevralın 28-də ABŞ və İsrail İrana qarşı hərbi əməliyyatlara başlayıb və bir sıra şəhərlərə hava zərbələri endirib. Həmin gün zərbələr nəticəsində İranın ali rəhbəri Əli Xamenei öldürülüb. Cavab olaraq İran İsrail ərazisinə raket zərbələri endirib və Fars körfəzi ölkələrindəki ABŞ hərbi bazalarına hücum edib.

İran, ABŞ və onların müttəfiqləri 2026-cı il aprelin 8-nə keçən gecə iki həftəlik atəşkəs barədə razılığa gəliblər.

Aprelin 11-12-də İslamabadda Pakistanın vasitəçiliyi ilə İran və ABŞ arasında danışıqlar keçirilib. Saatlarla davam edən müzakirələr razılaşma əldə edilmədən başa çatıb.

ABŞ Prezidenti Donald Tramp aprelin 15-də İran limanlarının dəniz blokadasının saxlanılmasına baxmayaraq, Hörmüz boğazının gəmiçilik üçün açıldığını elan etdi. Bu addım Çinlə münasibətlərin qorunub saxlanılması üçün atılmışdı. Daha sonra, aprelin 18-də İran İslam İnqilabı Keşikçiləri Korpusunun (SEPAH) Hərbi Dəniz Qüvvələri bunu atəşkəs razılaşmasının pozulması və İran limanlarının ABŞ hərbçiləri tərəfindən davam edən blokadası ilə əsaslandıraraq, Hörmüzün bağlandığını elan edib.