Mədəniyyət - Yenixeberorg.com - Oxu, xəbərin olsun

Hamısı bağlandı, Azərtaş qaldı:

Mon, 20 Apr 2026 11:24:03 +0400

Azərbaycanın audiovizual məkanında başlanan “mənəvi təmizlik” hərəkatı, təəssüf ki, ilk addımlarındaca ikili standartların və qeyri-şəffaf qərarların qurbanına çevrildi. Audiovizual Şuranın bir neçə tanınmış aparıcını efirdən uzaqlaşdırması cəmiyyətdə müsbət bir canlanma yaratsa da, Lalə Azərtaşın “Təsir dairəsi”nin bu “qara siyahıdan” kənarda qalması, islahatların səmimiliyini ciddi şəkildə şübhə altına qoyur.

Yenixeberorg.com: Nə üçün mənəviyyatı qorumaq missiyası Xəzər TV-nin qapısında dayanır? Əgər Xoşqədəm Hidayətqızı və ya Zaur Baxşəliyev mənəvi dəyərlərə zidd olduqları üçün cəzalandırılıblarsa, bəs Lalə Azərtaşın hər gün efirdə sərgilədiyi “insan faciəsi şousu” hansı milli koda xidmət edir? Bu sualın cavabı nə Audiovizual Şuranın qərarlarında, nə də kanalın rəsmi siyasətində öz əksini tapmır.

Biz bu verilişdə nəyi görürük? “Təsir dairəsi” illərdir ki, insanların ən yaralı, ən gizli və ən ağrılı məqamlarını bir reytinq materialı kimi bazarın mərkəzinə çıxarır. Bir uşağın atasının kimliyini tapmaq adı altında, halal ərinin yanında oturan qadının bətnindəki körpənin mənşəyini müzakirə etmək hansı mənəviyyatın göstəricisidir? Bu, sadəcə bir sosial məsələnin həlli deyil, bu, Azərbaycan ailə modelinin təməl sütunlarını efirdən balta ilə vurmaqdır.

Əgər bir ölkənin televiziyasında mənəviyyatdan danışılırsa, orada ailə dramı sirk tamaşasına çevrilməməlidir. “Təhsil”i və tərbiyəni ailə daxilində deyil, efir vasitəsilə DNT analizlərində axtaran bir cəmiyyət yetişdirmək ən böyük strateji səhvdir. Digər proqramların bağlanma səbəbi kimi göstərilən etik normaların pozulması faktı, Azərtaşın studiyasında hər gün “adiləşmiş reallıq” kimi yaşanır. Ortaya belə bir sual çıxır: Azərtaşda yaranan bu DNT analizi marağı haradan qaynaqlanır?

Xüsusilə sosial şəbəkələrdə qarşımıza çıxan o dəhşətli səhnələr – anaların kameralar qarşısında özünü vəhşicəsinə döyməsi, üz-gözünü yırtması, bağırtıların studiyanın divarlarını aşması – bu, mənəviyyat deyil, bu, kütləvi psixozun təbliğidir. Bağlanmış o biri verilişlərdə belə bu dərəcədə qatı aqressiya və özünəqəsd elementləri yox idi. Amma “Təsir dairəsi”ndə bu proses sanki bir ritualdır: əvvəlcə insanın özünə fiziki zərər yetirməsinə, fəryad qoparmasına tam şərait yaradılır, reytinq əyriləri yuxarı qalxdıqca isə aparıcı saxta bir “mərhəmət” maskası taxaraq prosesə müdaxilə edir. Biz niyə bu qədər bağırtıya, bu qədər qışqırığa və insanın daxili dünyasının bu qədər eybəcər şəkildə nümayişinə aşiq edilmişik? Çünki bizə illərdir təqdim olunan “mənəvi qida” məhz budur. Biz başqasının evinin içinə, mətbəxinə və yatağına baxmağa elə proqramlaşdırılmışıq ki, həqiqi mənəviyyatın sükutunu və ləyaqətini çoxdan unutmuşuq.

Audiovizual Şuranın “seçməli ədaləti” cəmiyyətdə belə bir rəy formalaşdırır ki, əgər arxanda güclü bir “himayədar” və ya kanal rəhbərliyi varsa, sən milli-mənəvi dəyərləri istənilən formada ayaqlar altına ata bilərsən. Əks halda, Lalə Azərtaşın verilişinin hələ də efirdə qalmasının başqa heç bir məntiqi izahı yoxdur.

Bu veriliş mənəviyyata xidmət etmir, əksinə, cəmiyyətdəki mənəvi aşınmanı “legitimləşdirir”. İnsanların çarəsizliyini, cahilliyini və faciəsini reklam fasilələri ilə bölmək jurnalistika etikasına sığmır. Əgər dövlət televiziya məkanını təmizləməkdə qərarlıdırsa, bu təmizlik yalnız müəyyən şəxsləri hədəf almamalıdır. Biz “Təsir dairəsi”nin mənfi təsirindən xilas olmayınca, digər verilişlərin bağlanması sadəcə efir vaxtının bir əldən başqa ələ keçməsindən başqa bir şey olmayacaq. Həqiqi mənəviyyat efirdəki qışqırıqlarda yox, ləyaqətli və tərbiyəvi proqramların cəmiyyətə aşıladığı dəyərlərdədir. Azərtaşın təqdim etdiyi “dairə” isə bizi sadəcə bataqlığın mərkəzinə doğru sürükləyir.(nocomment.az)

Əli Səfərli

"Sevgililərinə ev alırlar, amma sənətkarlara biganə qalırlar" -

Thu, 16 Apr 2026 10:19:27 +0400

"Bir xanımı sevəndə gedib ona ev, maşın alırlar, amma sənətkarlara biganə qalırlar".

Yenixeberorg.com xəbər verir ki, bunu APA TV-nin "Söz arasında" verilişində Xalq artisti Bilal Əliyev deyib.

"Azərbaycanın zirvədə olan sənətkarları var, onlara da diqqət edin", - o bildirib.

Əməkdar artistdən teatr cameasına SƏRT SÖZLƏR -

Tue, 14 Apr 2026 17:28:52 +0400

“Fani dünyada baş verənləri dərk edən yoxdur, amma axirətdə o insanları böyük bir imtahan gözləyir”.

Yenixeberorg.com xəbər verir ki, bu sözləri Əməkdar artist, tanınmış aktyor Çingiz Əhmədov “Gün ortası” verilişində qonaq olarkən deyib.

Sənətçi teatr mühitindəki bəzi həmkarlarını kəskin tənqid edərək, onlarla münasibətini kəsdiyini bildirib:

“Teatrda elə sənəti, titulu olan adamlar var ki, mən onlara salam belə vermirəm. Adlarını açıqlamayacağam, lakin demək ki, onlar həmin salama layiq deyillər. Teatrın maskasının bir üzü gülürsə, digər üzü kədərdir. Bizim həyatımız da belədir; içimiz özümüzü yandırır, çölümüz özgəni…”.

Gənclərə qarşı hər zaman qayğıkeş olduğunu vurğulayan aktyor, paxıllıq edənlərə isə xəbərdarlıq edib:

“Heç vaxt gənclərin qəlbinə dəymirəm. Həmişə onların dərdini dinləyirəm, əlimdən gələn köməkliyi göstərirəm. Amma elə adamlar var ki, kiminsə yıxılmasına, əzilməsinə kənardan baxıb sevinirlər. Mən ustadım Əliağa Ağayevdən böyük-kiçik yeri bilməyi, hörmət etməyi görmüşəm. Unutmasınlar ki, bu dünya fanidir. Bəlkə elə mənim özümü də axirətdə böyük imtahan gözləyir… Günahsız insan yoxdur”.

Xalq artisti Maqsud Məmmədov vəfat edib

Mon, 13 Apr 2026 17:54:17 +0400

Görkəmli baletmeyster Xalq artisti Maqsud Məmmədov vəfat edib.

Yenixeberorg.com xəbər verir ki, bu barədə Mədəniyyət Nazirliyi məlumat yayıb.

Qeyd olunub ki, o bu gün 97 yaşında vəfat edib.

Məlumat üçün bildirək ki, Maqsud Davud oğlu Məmmədov 30 may 1929-cu ildə Gəncədə anadan olub.

Bakı Xoreoqrafiya Məktəbinə daxil olan Maqsud Məmmədovun yüksək sənət göstəriciləri nəzərə alınaraq Moskva Xoreoqrafiya Məktəbinə göndərilib və 1950-ci ildə bu təhsil ocağını bitirib.

O, 1951-ci ildən Azərbaycan Dövlət Akademik Opera və Balet Teatrında çalışıb.

Maqsud Məmmədov dünya və Azərbaycan balet sənəti nümunələrində mürəkkəb partiyaları – Ziqfrid ("Qu gölü"), Albert ("Jizel"), Bazil ("Don Kixot"), Polad ("Qız qalası"), Azad ("Gülşən), Fərhad ("Məhəbbət əfsanəsi"), Lenni ("İldırımlı yollarla") və s. böyük uğurla ifa edib, baletsevərlərin dərin rəğbətini qazanıb.

Onun həyat yoldaşı, görkəmli balerina, Xalq artisti Rəfiqə Axundova ilə birgə quruluş verdiyi Tofiq Bakıxanovun "Xəzər balladası", Fərəc Qarayevin "Qobustan kölgələri", "Kaleydoskop", Rauf Hacıyevin "Azərbaycan süitası", Nazim Əlivedibəyovun "Muğam", Aqşin Əlizadənin "Babək" baletləri istedadlı baletmeysterə böyük şöhrət qazandırıb.

Milli mədəniyyətimizin inkişafında xidmətlərinə görə Maqsud Məmmədov 1955-ci ildə "Əməkdar artist", 1970-ci ildə isə "Xalq artisti" fəxri adlarına layiq görülüb.

2019-cu ildə "Şöhrət" ordeni ilə təltif olunan sənətkar 2002-ci ildən Prezidentin fərdi təqaüdçüsü idi.

"Mədəniyyət haqqında" qanuna dəyişikliklər III oxunuşda qəbul edilib

Fri, 10 Apr 2026 11:34:39 +0400

Milli Məclis mədəniyyət sahəsində layihələrin qrant maliyyələşdirilməsi üzrə müsabiqələrin keçirilmə qaydasını son oxunuşda qəbul edib.

Yenixeberorg.com xəbər verir ki, bununla bağlı "Mədəniyyət haqqında" qanuna dəyişiklik layihəsi parlamentin bugünkü iclasında müzakirə olunub.

Qeyd edilib ki, "Qrant haqqında" qanuna əsasən hüquqi və fiziki şəxslərə qrantların verilməsi ilə bağlı hər hansı məhdudiyyət müəyyən edilməsə də, Nazirlər Kabinetinin müvafiq qərarı ilə təsdiqlənən "Qeyri-hökumət təşkilatları tərəfindən mədəniyyət sahəsində keçirilən tədbirlərin dövlət maliyyələşdirilməsi Qaydası" mədəniyyət sahəsində yalnız QHT-lər üçün tədbirlərin maliyyələşdirilməsi prosedurunu müəyyənləşdirir.

Layihəyə əsasən, mədəniyyət sahəsində keçirilən tədbirlərin qrant maliyyələşdirilməsi üzrə QHT-lərlə yanaşı, hüquqi şəxslərin digər növləri, eləcə də fiziki şəxslər ilə bağlı tənzimləmənin həyata keçirilməsi üçün xüsusi qaydanın təsdiq edilməsi zəruridir. Bunlar nəzərə alınaraq, mədəniyyət sahəsində layihələrin qrant maliyyələşdirilməsi üzrə müsabiqələrin keçirilməsi qaydasının müəyyən edilməsi məqsədilə "Mədəniyyət haqqında" qanuna dəyişiklik təklif edilib.

Sənəddə vurğulanıb ki, sözügedən qanunda yaradıcı sənaye ilə bağlı tənzimlənmə mövcud olsa da, bu ifadəyə anlayış verilməyib. "Mədəni və yaradıcı sənaye" ifadəsindən "2022-2026-cı illərdə sosial-iqtisadi inkişaf Strategiyası"nın Tədbirlər Planında, "Azərbaycan Mədəniyyəti – 2040" Mədəniyyət Konsepsiyası"nda və digər sənədlərdə istifadə edilib. Bu xüsusda, layihədə "mədəni və yaradıcı sənaye" anlayışının da təsbit edilməsi nəzərdə tutulur.

Müsabiqələrin keçirilməsi qaydasını müvafiq icra hakimiyyəti orqanının müəyyən etdiyi orqan (qurum) müəyyənləşdirəcək.

Qanun layihəsi müzakirələrdən sonra səsverməyə qoyularaq üçüncü oxunuşda qəbul edilib.

Opera və Balet Teatrında qalmaqal:

Tue, 07 Apr 2026 16:00:41 +0400

Opera və Balet Teatrının direktoru, Xalq artisti Yusif Eyvazovun 44 günlük Qarabağ müharibəsi veteranı, teatrın solisti Atəş Qarayevin aylıq əmək haqqını kəsdiyi iddia olunur.

Yenixeberorg.com: Bu barədə Atəş Qarayev özü məlumat verib.

O, rəhbərliyin bu addımını özünə qarşı hörmətsizlik kimi qiymətləndirib:

"Yusif Eyvazov dünya şöhrətli opera ifaçımızdır. Onun bu teatra direktor təyin olunmasına çox sevindik. Dünya səhnələrində təcrübəsi var, düşündük ki, orada qazandığı təcrübəni Azərbaycan teatrında tətbiq edəcək. Amma təəssüf ki, belə olmadı. Bizə qarşı qanunsuz qərarlar tətbiq olundu. Bildirildi ki, hər gün səhər teatra gəlib, işdə olduğumuza dair kadrlar şöbəsində qeydiyyat kitabına imza atmalıyıq. Halbuki bizim əməkdaşlar məşqlər və dərslər olduqda işə gəlirlər. Birdən-birə tələb olundu ki, hər gün, hətta iş olmasa belə, teatra gəlib imza atmalıyıq. Biz buna etiraz etdikdə iclasda bildirildi ki, bu qərar nazirlik tərəfindən verilib. Sonradan digər teatrlarla əlaqə saxladıq və məlum oldu ki, belə bir qərar yoxdur. Həmin günlərdə uşağımı və valideynlərimi həkimə apardığım üçün işə gələ bilməmişdim. Rəhbərlik də bundan istifadə edərək 217 manat əmək haqqımı kəsib".

Atəş Qarayev bildirib ki, məsələ teatrın iclasında da müzakirə olunub:

"İclasda Xalq artistləri də bu qərara etiraz etdilər. Samir Cəfərov, Təyyar müəllim qeyd etdilər ki, Atəş teatrın veteranıdır və onun əmək haqqı kəsilməməlidir. Mən də Yusif müəllimə müraciət edərək bildirdim ki, veteranam, ailə başçısıyam, iki azyaşlı övladım var, kirayədə yaşayıram, kredit öhdəliklərim var. Aylıq maaşıma güvənirəm, onun da yarısını kəsiblər. Bu vəziyyətdə uşaqlarımı necə dolandırım?".

Solistin sözlərinə görə, teatrda əmək haqqı kəsilən digər şəxslərin sonradan vəsaiti bərpa olunsa da, onun maaşı qaytarılmayıb:

"Yalnız mənim maaşım qaytarılmadı. Niyə? Axı müharibədə mən iştirak etmişəm. Bu, açıq-aşkar ayrı-seçkilikdir. Digərlərinin maaşları bərpa olunduğu halda, mənimkini kəsmək ədalətsizlikdir. İclasda da qeyd olundu ki, biz isti evdə olanda Atəş ön cəbhədə döyüşürdü. Prezident dəfələrlə bildirib ki, veteranlara və qazilərə hörmətlə yanaşılmalıdır. Mən xüsusi münasibət yox, sadəcə kəsilmiş əmək haqqımın qaytarılmasını istəyirəm. Bu haqsızlıq məndə ciddi məyusluq yaradıb. Xahiş edirəm ki, pozulmuş hüquqlarım bərpa olunsun".(Qaynarinfo)

Küçə "incəsənət"inin uşaqları və ya mədəni mirasa hücum -

Fri, 03 Apr 2026 17:59:13 +0400

Bu günlərdə ölkə əhəmiyyətli memarlıq abidəsi olan Nizami Kino Mərkəzinin fasadı kobud müdaxiləyə məruz qalıb.

Yenixeberorg.com: Binanın fasadına boya ilə cızma-qara edilib, eybəcər şəkillər çəkilib. Bir sözlə paytaxt Bakının mərkəzində yerləşən ən gözəl binalardan birinə qarşı vandallıq aktı törədilib.

Daxili İşlər Nazirliyi həmin aktı törədən 4 yeniyetmə və gəncin şəxsiyyətini müəyyən edərək onların valideynlərinin də iştirakı ilə profilaktik iş aparmağa başlayıb. Şəxsiyyəti müəyyən edilən şəxslərdən ikisinin 16, birinin 17, birinin isə 20 yaşı var.

Şübhəsiz, baş verən hadisəyə lazımi hüquqi qiymət veriləcək, lakin burada memarlıq və mədəniyyət baxımından yanaşmanın da vacib olduğunu unutmaq olmaz.

XX əsrin yetmişinci illərində ABŞ-də yaranan qraffiti sənəti sonradan dünyanın bir çox ölkəsinə, xüsusilə qərb ölkələrinə yayılıb. Təbii ki, bu, qeyri-leqal bir məşğuliyyətdir, ancaq estetik baxımdan uğurlu nümunələri də olur. Bakıda edilən isə daha çox qraffitinin Wild Style - "vəhşi üslub"una xarakterikdir və adından da göründüyü kimi, söhbət hansısa yaradıcı insanın özünü ifadə etməsindən deyil, adi vəhşilikdən, özbaşınalıqdan gedir.

Əgər biz bu davranışı ən yumşaq formada qraffiti kimi qiymətləndirsək belə, qeyd eləməliyik ki, Azərbaycanda nə müasir dövrdə, nə də ötən əsrlərdə adıçəkilən sənət sahəsi heç bir halda yayğın olmayıb. Bir sözlə, qraffiti və bənzər küçə sənətləri Azərbaycanın sənət ənənələrinə və Bakının tarixi simasına tamamilə yaddır.

Azərbaycan paytaxtı həm müasir görünüşü, həm də tarixi memarlığı ilə dünyanın ən təmiz və baxımlı paytaxt şəhərlərindən biri hesab edilir. Əlbəttə ki, bu təmizlik və nizam şəhərin beynəlxalq imicinin də əsas tərkib hissələrindən biridir.

Ümumiyyətlə, memarlıq kontekstindən baxdıqda isə bu cür yazılar şəhərin ümumi görkəmini korlamaqla yanaşı, həm də mədəniyyət anlayışına hörmətsizlik kimi qiymətləndirilməlidir. Bakı hər birimizin şəhəri və yaşayış yeri olduğu kimi, onun memarlıq irsini qorumaq və bu səliqəni saxlamaq isə hər bir sakinin üzərinə düşən məsuliyyətdir.

Baş verən hadisəni törədən şəxslərin polis tərəfindən müəyyən edildiyini, onların 16-20 yaş kateqoriyasına aid olduqlarını qeyd etdik. Məlumdur ki, bu dövr gənclərin özünü təsdiq etmək, müstəqil davranmaq və sosial mühitdə fərqlənmək istəyinin ən pik dövrüdür. Belə olan halda, aydın məsələdir ki, onlar çox vaxt emosiyalarının təsiri altında hərəkət edir, bunun hüquqi, eləcə də mənəvi nəticələrini dərk etməkdə çətinlik çəkirlər.

Beləcə, bu mərhələdə düzgün yönləndirmə və sosial nəzarətin zəif olması bu kimi zərərli davranışlara, hətta daha faciəvi nəticələrə yol aça bilir. Bu mənada, sözügedən davranışın ciddi tərbiyə boşluğundan qaynaqlandığını da demək mümkündür.

Dövrün internet əlçatanlığı, ağıllı mobil cihazlar, süni intellekt və digər bu əsasda olan texniki bolluq bu günün gənc nəsli üçün özünüinkişaf, texnologiyaya yiyələnmək və yaradıcılıqla məşğul olmaq üçün müxtəlif növ şərait yaradır. Lakin təəssüf ki, adlarını çəkdiyimiz texnoloji imkanlar həmçinin onlarda fikir qarışıqlığı, zərərverici meyillərin də formalaşmasına gətirib çıxara bilir.

Məhz belə məqamda valideyn nəzarəti, övladla mütəmadi dialoq birə beş vacibiyyət daşıyır. Bir sözlə, şəhərin mədəni görünüşünə elə, ya belə zərər vurmaq heç bir halda özünüifadə forması kimi qəbul edilə bilməz.

Valideynlər övladlarının texnoloji yeniliklərdən, onların təsiri ilə formalaşan davranışlarından hansı məqsədlə istifadə etməsinin birbaşa ailədaxili tərbiyə və nəzarətdən asılı olduğunu unutmamalı, bu istiqamətdə daimi nəzarəti gücləndirməlidir. Gənclərin özünüifadə ehtiyacını milli-mənəvi dəyərlərimizə zidd olan, şəhərimizin tarixi simasına xələl gətirən vandal davranışlarla həyata keçirilməsi, əlbəttə, birbaşa valideyn məsuliyyətsizliyini qabardır. Yəni ən sadə dillə ifadə edəsi olsaq, valideyn övladının gecə saatlarında hara və niyə getdiyini, nə etdiyini, nə məqsədlə etdiyini bilməlidir. Bu onun valideyn məsuliyyətidir.

Və nəhayətində, unutmaq olmaz ki, Bakının tarixi memarlıq irsini qorumaq hər bir şəhər sakininin mənəvi borcudur. Bu abidələr şəhərin beynəlxalq imicinin və milli kimliyimizin əsasını təşkil edir. Vandalizm hallarına qarşı həm hüquqi addımların atılması, həm də gənc nəsildə ictimai məsuliyyət hissinin formalaşdırılması Bakının tarixi simasının olduğu kimi gələcəyə ötürülməsi üçün əsas şərtdir.

Nizami Kino Mərkəzi bu nümunələrdən, sadəcə, biridir...(Report)

Mədəniyyət Nazirliyində struktur dəyişikliyi olub, Aynur Kərimova sektor müdiri təyin edilib

Fri, 03 Apr 2026 12:45:35 +0400

Mədəniyyət Nazirliyinin Aparatında idarəetmədə səmərəliliyinin artırılması, mədəniyyət sahələrində idarəetmənin tənzimlənməsi məqsədilə ilk mərhələdə struktur təkmilləşdirilməsi həyata keçirilib, şöbə və bölmələrin fəaliyyəti optimallaşdırılıb.

Yenixeberorg.com: Bu barədəMədəniyyət Nazirliyi məlumat yayıb.

Bildirilib ki, konsepsiyada nəzərdə tutulan yeni idarəetmə yanaşmaları və mədəniyyətin yeni fəaliyyət sahələri bu istiqamətlər üzrə effektiv idarəetmə və nəzarətin təmin olunmasını tələb edir.

"Bu baxımdan, Mədəniyyət Nazirliyinin Aparatında yeni struktur vahidlərinin formalaşdırılması və mövcud şöbələrin funksional bölgüsünün yenidən təşkili həyata keçirilir. Nəticədə aparatın yenilənmiş strukturunda konspesiyada müəyyənləşmiş mədəniyyətin yeni sahələrinə uyğun olaraq idarəetmə formalaşdırılıb, kommunikasiya, rəqəmsallaşma və əlaqələndirmə mexanizmləri təkmilləşdirilib".

Eyni zamanda vurğulanıb ki, həyata keçirilən optimallaşdırmadan sonra Mədəniyyət Nazirliyinin Media ilə iş üzrə sektor müdiri Aynur Kərimova olub.

Səməndərdən 40, Mikayıldan 20 il sonra Rasim də köçdü

Fri, 03 Apr 2026 09:30:31 +0400

“Dünya duracaq yer deyil, ey can səfər eylə!

Aldanma anın (h)alına andan həzər eylə!”(Nəsimi)

Yenixeberorg.com: Onlar üçü də bir-birindən 2-3 yaş aralığı ilə Ağsuda dünyaya göz açıblar, böyükləri sözün gerçək anlamında BÖYÜK SƏMƏNDƏR (Rzayev) olub; 1945-ci ilin 2 yanvarında doğulan gələcəyin “İNSAN! Məğrur səslənir!” deyən BÖYÜK AKTYORU! Mikayıl Mirzə 1947-ci ilin 1 yanvarında, Rasim Balayev 1948-ci ilin 8 avqustunda. İlk teatr məşqlərini, tamaşalarını da, böyüklərimizdən eşitdiyimə görə, Ağsu çayının qırağında yerləşən məktəb heyətində oynayıblar. Doğulmaqları “yanaşı” olsa da, ölümləri arasında düz 20 il-20 il ayrıntı olub. Yenə Səməndər “böyüklük” edib, qabağa düşüb, 1986-cı ilin martın 27-də 41 yaşında yolunu Yasamal qəbristanlığına salıb. 20 il sonra- 2006-cı ilin 3 iyununda 59 yaşlı Mikayıl Mirzə II Fəxri Xiyabanı, ondan 20 il sonra-2026 -cı ilin 29 martında 77 yaşlı Rasim Balayev I Fəxri Xiyabanı özlərindən xəbərsiz “seçiblər”. Özləri bilmirlər ki, harda basdırılıblar! (Lap “Nəsimi”də Nəiminin qızının atasının harda olduğuna cavabıdır: “Özü bilmir ki hardadır”) Ömür yollarının uzunluqları arasındakı yaş ayrıntısı da bir igidin ömrü qədərdir: 18 il! Böyük Səməndər 41, Mikayıl 59, Rasim 77 il ömür sürüb. Ramiz Rövşənin dediyidir, ya bir geniş yolu tut get, ya düş ensiz cəğırına; bütün yollar gedib çıxır ömrümüzün axırına.

Rasim Balayev ömür yolunun 78-ci duracağına dörd ay qalmış Nəsiminin dili ilə “Dünya duracaq yer deyil, ey can, səfər eylə!” deyib “ikisinə də sığmadığı cahanın” o birinə köçdü. Gedən cismi oldu, ruhu ölməzdir.

Məğrur Bədəlsoy

Adil Kərimli Ağdamda vətəndaşları qəbul edəcək

Wed, 01 Apr 2026 13:04:25 +0400

Mədəniyyət naziri Adil Kərimli Ağdamda vətəndaşları qəbul edəcək.

Yenixeberorg.com: Bu barədə Mədəniyyət Nazirliyindən məlumat yayıb.

Bildirilib ki, aprelin 17-i saat 10:00-da Ağdam şəhəri, Heydər Əliyev prospekti, "İmarət" küçəsidə Ağdam, Füzuli, Xocavənd rayonlarından olan vətəndaşların qəbulu keçiriləcəkdir.

Vətəndaşlar 2026-cı il aprelin 13-dək Nazirliyin info@culture.gov.az elektron poçt ünvanı, (012) 493-43-98 telefon nömrəsi vasitəsilə müraciət etməklə qəbula yazıla bilərlər.